“Омикрон”-ы улмаас боловсон хүчний хомсдолд орсон Лондоны эмнэлгүүдэд цэргийн бие бүрэлдэхүүн тусламж үзүүлэхээр боллоо

“Омикрон” хувилбарын тархалтын улмаас эрүүл мэндийн салбарын олон ажилчид вирусийн халдвар авч, ажиллах боломжгүй болсон тул Лондон дахь эмнэлгүүдэд туслах зорилгоор зэвсэгт хүчнийг байрлуулж байна.

Нийт 200 цэргийн албан хаагчийн 40 нь эрүүл мэндийн салбарын ажилтнуудад өвчтөнийг эмчлэхэд тусалж, бусад 160 албан хаагч өвчтөнийг шалгаж, хангамжийн нөөцөд хяналт тавихаас гадна анхан шатны үзлэг хийнэ гэж Батлан ​​хамгаалах яам мэдэгдэв.

Зарим нь аль хэдийн ажлаа эхлүүлсэн бөгөөд энэ сарын эцэс хүртэл нийслэлийн эрүүл мэндийн газруудад ажиллах төлөвтэй байна.

Лондонд нийгмийн эрүүл мэндийн салбарын олон мянган ажилтан долоо хоног бүр ажлаасаа гарч байсан бөгөөд өнгөрсөн сард шинэ хувилбарын улмаас тохиолдлын тоо эрчимтэй нэмэгдсэний дараа урьд өмнө хэзээ ч болж байгаагүй хүний нөөцийн хомсдолыг даван туулахад улам бүр хэцүү болжээ.

Эрүүл мэндийн үйлчилгээ үзүүлэгч эмнэлгүүдийн холбооны гүйцэтгэх захирал Крис Хопсон зэвсэгт хүчний ажилтнуудын тусламжийг талархан хүлээн авчээ. Гэхдээ тэрээр орон тооны хомсдолын цар хүрээг онцолсон байна.

Тэрээр "Бид армийн эмч нар болон ерөнхий алба хаагчдыг дуудах шаардлагатай байгаа нь нийгмийн эрүүл мэндийн салбарт тулгарч буй ажиллах хүчний сорилтуудын цар хүрээг онцолж байна. Цар тахлын туршлага нь эрүүл мэнд, тусламж үйлчилгээний ажиллах хүчний үндэсний урт хугацааны төлөвлөгөө, сул орон тоотой холбоотой үргэлжилсэн сорилтууд, цар тахлаас өмнө ажиллах хүчний нөөц бүрдүүлэх зэрэг шийдвэрлэх шаардлагатай үндсэн асуудлуудыг тодорхой харуулж байна" гэж мэдэгдэв.

Мөн Хопсон ковидын өвчтөнүүдийн тоо эрс нэмэгдэж байгаа Английн бусад эмнэлгүүд цэргийн тусламж хүсэж магадгүй гэв.

Пүрэв гарагт Их Британид ковидын 179,756 тохиолдол бүртгэгдэж, “Омикрон” хувилбараар халдвар авсан хүмүүсийн тоо хурдацтай нэмэгдсээр байгаа тухай мэдээлэв.

Хамгийн сүүлийн үеийн тоо баримтаас харахад сүүлийн долоо хоногт Их Британийн нийт ковидын тохиолдлын тоо 1,272,131 болж, өмнөх долоо хоногоос 29 хувиар өссөн байна. Гэхдээ мэргэжилтнүүд халдварын жинхэнэ тоо нэлээд өндөр байх магадлалтай гэж тооцоолж байна.

Түүнчлэн Англид 17,988 ковидын халдвартай өвчтөн эмнэлэгт хэвтэн эмчлүүлж байгаа бол өмнөх өдөр нь 15,659 байжээ. Мөн пүрэв гарагт Их Британи даяар шинжилгээгээр эерэг гарснаас хойш 28 хоногийн дотор 231 хүн нас баржээ.

Цэргийн албан хаагчид өмнөх давлагааны үеэр эмнэлгүүдэд дэмжлэг үзүүлж, Уэльс, Шотландын түргэн тусламжийн үйлчилгээ болон нэмэлт тунгийн вакцинжуулалтын хөтөлбөрт үргэлжлүүлэн тусалж байсан юм.

Эх сурвалж: The Guardian