Дэлхийн хамгийн хүйтэн хот Якутскд агаарын хэм -50-д хүрч, рекорд тогтоожээ

Энэ долоо хоногт дэлхийн хамгийн хүйтэн газруудын нэгд тооцогддог Зүүн Сибирийн Якутск хотод агаарын хэм Цельсийн -50 хэмд хүрч, рекорд тогтоожээ.

Москвагаас зүүн тийш 5,000 километрийн зайд, Оросын Алс Дорнодын мөнх цэвдэгт орших уг хотод термометр тогтмол хасах 40 хэмээс доош заадаг.

Тэр дундаа нэгдүгээр сар бол хамгийн хүйтэн сар байдаг бөгөөд оршин суугчид нь хүйтэнд дассан байдаг ч энэ жил ердийнхөөс илүү хүйтэн, мөн цочир хүйтэн удаан үргэлжилж байгааг хэлж байна.

Ойрын өдрүүдэд цаг агаар дулаарах төлөвгүй байгаа ба хэт хүйтэн хотын эрчим хүчний дэд бүтцэд нөлөөлж болзошгүй гэж оршин суугчид болгоомжилж байна.

Оршин суугчдын хэлснээр хамгийн сүүлд 2018 онд маш хүйтэн байсан бөгөөд тухайн үед сормуус хүртэл хөлдөж байжээ.

Нэг сая хүрэхгүй оршин суугчтай Якутскийн өвөл эрс тэс боловч өнгөрсөн долдугаар сард ойр орчимд нь ой хээрийн түймэр гарч, бүс нутгийг өтгөн утаа бүрхсэн билээ.

Эрдэмтэд Сибирийн хойд туйлд уур амьсгалын өөрчлөлтөөс үүдэлтэй гал түймрийн давтамж нэмэгдэж байгаад сэтгэл түгшиж байгаагаа илэрхийлсээр байна.

Эх сурвалж: CNN