В.Путин Украины Херсон муж дахь цэргийн штабт зочилжээ

Оросын Ерөнхийлөгч Владимир Путин Украины өмнөд хэсгийн Херсон муж дахь цэргийн штабуудад зочилж, цэргүүдтэй уулзсан тухай тус улсын төрийн мэдээллийн “Тасс” агентлаг мягмар гарагт мэдээлэв.

Путин Херсон мужид болсон цэргийн командлалын хуралд оролцож, Агаарын цэргийн хүчин болон “Днепр” бүлэглэлийн командлагч, мөн бусад ахлах офицеруудаас Херсон, Запорожье мужуудын нөхцөл байдлын талаар тайланг сонсжээ.

Оросын цэргүүд өнгөрсөн арваннэгдүгээр сард Украины сөрөг довтолгооны улмаас бүс нутгийн нийслэл Херсон хотоос ухарсан бөгөөд Днепр мөрний зүүн эрэгт байр сууриа бэхжүүлсээр байгаа юм.

Путин мөн Москвагийн өөртөө нэгтгэсэн Украины зүүн хэсгийн Луганск муж дахь үндэсний харуулын штабт мөн зочилжээ.

Түүний айлчлал хэзээ болсон талаар Кремль мэдээлэл өгөөгүй байна.

Эх сурвалж: Reuters