Оросын түрэмгийлэл эхэлснээс хойш анх удаа БНХАУ-ын дарга Ши Жиньпин Зеленьскийтэй ярьжээ

Украины Ерөнхийлөгч Володимир Зеленьский Орос улс Украин руу цэргийн хүчээр түрэмгийлснээс хойш анх удаа БНХАУ-ын дарга Ши Жиньпинтэй утсаар ярьсан тухайгаа мэдэгдлээ.

Хятадын төрийн “CCTV” телевиз мөн дуудлагын талаар мэдээлэв.

“Би БНХАУ-ын дарга Ши Жиньпинтэй утсаар урт бөгөөд утга учиртай яриа өрнүүллээ. Энэ яриа болон Украинаас Хятадад суух Элчин сайдыг томилсон явдал нь манай хоёр орны харилцааны хөгжилд хүчтэй түлхэц өгнө гэдэгт итгэж байна” гэж Зеленьский хэлсэн байна.

Өнгөрсөн гуравдугаар сард Ши Жиньпин Москвад айлчилж Оросын Ерөнхийлөгч Владимир Путинтэй уулзсан.

Хятад улс Украин, Оросын хоорондох мөргөлдөөнд төвийг сахисан байр суурь илэрхийлж, мөргөлдөөнийг дипломат аргаар шийдвэрлэж, энх тайван тогтоохыг уриалдаг. Гэсэн ч Оросын түрэмгийллийг буруушааж, Украинаас цэргээ татахыг олон нийтэд уриалахаас татгалзсаар ирсэн билээ. Мөн Хятадын албаны хүмүүс улс орнуудын аюулгүй байдлын ашиг сонирхлыг харгалзан үзэх ёстой гэж удаа дараа мэдэгдэж, НАТО болон АНУ-ыг мөргөлдөөнийг өдөөж байна гэж буруутгадаг.

Эх сурвалж: CNN