“Тэрбум мод” үндэсний хөдөлгөөний хүрээнд “Ачит Ихт” ХХК мод үржүүлгийн газар байгуулж, гурван сая мод тарина

Монгол Улсын Ерөнхийлөгч Ухнаагийн Хүрэлсүх “Тэрбум мод” үндэсний хөдөлгөөний хүрээнд Орхон аймагт ажиллаж байна. Энэ үеэрээ “Ачит Ихт” ХХК-ийн катодын зэсийн үйлдвэрт ажиллалаа.

“Ачит Ихт” ХХК-ийн катодын зэсийн үйлдвэрт “Эрдэнэт үйлдвэр” ТӨҮГ-ын холимог хүдрийн үүсмэл ордын нөөцийг гидрометаллургийн аргаар уусгаж, 99.999 хувийн цэвэршилттэй катодын зэсийг экспортод гаргаж байна.

Үйлдвэр 2014 онд ашиглалтад орсноос хойш нийт 88 мянган тонн зэс экспортолж, 258.1 тэрбум төгрөгийг улс болон орон нутгийн төсөвт төвлөрүүлжээ.

Тус компани 2021 онд 7,824 тонн катодын зэс үйлдвэрлэсэн бол энэ онд 7,400 тонн катодын зэсийг үйлдвэрлэх төлөвлөгөөтэй ажиллаж байна.

Монгол Улсын Ерөнхийлөгчийн санаачилсан “Тэрбум мод” үндэсний хөдөлгөөнийг “Ачит Ихт” ХХК бүрэн дэмжиж байгаа бөгөөд ирэх 10 жилд орон нутагт 3 сая мод тарьж ургуулна.

Энэ зорилтынхоо хүрээнд “Далайн хошууны шинэс” ХХК-ийг байгуулж, Орхон аймгийн Баян-Өндөр сумын Шар чулуутын аманд мод үржүүлгийн газар байгуулсан талаараа танилцууллаа.

“Ачит Ихт” ХХК нь нийгмийн хариуцлагын хүрээнд байгальд сөрөг нөлөө багатай, дэвшилтэт технологи ашиглахаас гадна байгаль орчныг нөхөн сэргээх, булаг шандыг хамгаалах, ан амьтныг хамгаалах чиглэлд анхаарал хандуулан ажиллаж байна. Тухайлбал, Орхон аймгийн Баян-Өндөр суманд 3.3 га талбайг 100 хувь нөхөн сэргээж, 2016-2022 онд 3.1 га талбайд 8,500 гаруй мод тарьсан байна.

Тус компани 200 гаруй үндсэн ажилтантай бөгөөд Лондонгийн металлын биржийн гишүүн болсон анхны монгол компани юм.

Монгол Улсын Ерөнхийлөгчийг дагалдан Ерөнхийлөгчийн Тамгын газрын дарга Я.Содбаатар, Байгаль орчин, аялал жуулчлалын сайд Б.Бат-Эрдэнэ, Ерөнхийлөгчийн Байгаль орчин, ногоон хөгжлийн бодлогын зөвлөх Н.Батхүү нар Орхон аймагт ажиллаж байна.