Орос Украинд цөмрөн орсноос хойших анхны цөмийн сургуулилалтаа хийлээ

Орос жил бүр зохион байгуулдаг стратегийн цөмийн хүчний сургуулилалтаа хийж, энэ үеэр баллистик болон далавчит пуужингуудыг Арктикаас Оросын Алс Дорнод руу харвасан байна.

Тус улс хамгийн сүүлд Украин руу довтлохоос тав хоногийн өмнө цөмийн сургуулилалт хийж байв.

Шинэ эхлэл зэвсгийн гэрээний нөхцөлийн дагуу Орос сургуулилалт хийх талаараа АНУ-д урьдчилан мэдэгдсэн бөгөөд хариуд нь Вашингтоны Батлан хамгаалах яам Орос зэвсгийн хяналтын үүргээ биелүүлж байгааг онцолсон байна.

НАТО мөн баруун хойд Европт “Steadfast Noon” нэртэй цөмийн сургуулилалт хийж байгаа. Сургуулилалт ням гараг хүртэл үргэлжлэх ба энэ үеэр 14 улс Бельги, Их Британи, Хойд тэнгисийн дээгүүр хамтарсан сургалтын нислэг үйлдэнэ гэв.

Оросын Батлан ​​хамгаалахын сайд Сергей Шойгу телевизээр сургуулилалтын талаар ярихдаа “Дайсны цөмийн цохилтын хариуд стратегийн цөмийн хүчний асар их хэмжээний цөмийн цохилт өгөх”-д цэргийн бие бүрэлдэхүүнийг дадлагажуулах зорилготой гэж хэлжээ.

“Ярс” тив хоорондын баллистик пуужинг Москвагаас хойд зүгт 800 км-ийн зайд орших Плесецкийн сансрын буудлаас хөөргөсөн бол “Синева” баллистик пуужинг Баренцын тэнгисээс Оросын Алс Дорнод дахь Камчатка муж дахь алслагдсан Кура туршилтын талбай руу харвасан гэж Кремль мэдэгдэв.

Бүх пуужингууд байгаа оносон байна.

Сургуулилалтыг тус улсын Ерөнхийлөгч Владимир Путин видео холбоосоор дамжуулан ажиглажээ. Бүс нутгийн тагнуулын байгууллагуудын бага хурал дээр түүний хэлсэн үгийг мөн холбоосоор дамжуулсан бөгөөд тэрээр Украиныг “бохир бөмбөг”-ний асуудлаар буруутгаж байгаагаа дахин илэрхийлэв.

Түүнчлэн сүүлийн саруудад Оросоос Украины эсрэг гаргасан үндэслэлгүй бусад мэдэгдлүүдийг, тухайлбал, АНУ Украиныг “цэргийн биологийн туршилтын талбар” болгосон гэх мэдэгдлийг давтсан байна.

Эх сурвалж: BBC