Г.Занданшатар: +70 градус хүртэлх хүнд орчин нөхцөлд онцгой ур чадвар гаргаж ажилласан гагнуурчдыг шагнаж, урамшуулна

Ерөнхий сайд Г.Занданшатар Диспетчерийн үндэсний төв болон ТЭЦ-4  ТӨХК бэлэн байдлын горимд хэрхэн ажиллаж байгаатай танилцлаа.

Өнгөрсөн өдрүүдэд Улаанбаатар хотод цахилгаан хязгаарласантай холбогдуулан Ерөнхий сайд Г.Занданшатар "Диспетчерийн үндэсний төв" ТӨХХК-д ажиллаж, бэлэн байдлыг нь шалгав. 

Өнөөдрийн 10:00 цагийн байдлаар  төвийн нэгдсэн системийн ачаалал 597 мВт. 30 орчим мВт импортын, баттерей хураагуурт 160 мВт-ын нөөцтэй байна гэж тус компанийн удирдлагууд танилцуулав. Амралтын өдрүүдэд цаг агаар харьцангуй тогтуун, хүйтний эрч сулрах төлөвтэй байгаа тул үүнийг ашиглаж нөөцөө нэмэхийг Ерөнхий сайд даалгав. 

ДЦС4-ийн зуухны асуудал арилж, Бөөрөлжүүт цахилгаан станц бүрэн хүчин чадлаараа ажиллаж байгаа тохиолдолд цахилгаан хязгаарлахгүй гэж тус төвийнхэн танилцуулав. Ерөнхий сайд Г.Занданшатар 24 цаг тасралтгүй ажиллаж буй инженер, техникийн ажилтнуудад талархал илэрхийллээ.

Г.ЗАНДАНШАТАР: Бөөрөлжүүт цахилгаан станц нийлүүлэлтээ суурилагдсан хүчин чадалдаа (300 мВт) барина гэж мэдэгдсэн. Цаашид цахилгаан станцуудын өртөг зардлыг бууруулан үр ашгийг нэмэгдүүлж, технологийн норм, дүрэм, стандартыг дагаж байгаа эсэхэд давхар хяналт тавих хэрэгтэй. Технологи алдагдсанаас болж доголдол үүсэж байна. Хэрэглэгчдийг чирэгдүүлж болохгүй. 

Эрчим хүчний ачаалал өнөө өглөөний 05:00 цагаас хойш тогтворжсон гэж "Диспетчерийн үндэсний төв" ТӨХХК-ийн удирдлагууд мэдээлэв. Өнгөрсөн өдрүүдэд системд чадлын дутагдал үүсэхэд эрсдлээс сэргийлж, хязгаарлалтын хамрах хүрээг тэлсэн гэж тайлбарлалаа. Ингэхдээ Улаанбаатар хотыг 16 хэсэгт хувааж, нэг удаадаа 60 мВт хэрэглээг хязгаарлах зохицуулалт хийж байжээ.

"ДЦС-4"-ИЙН ЗУУХАНД ГАРСАН ГЭМТЛИЙГ 18 ЦАГИЙН ДОТОР ЗАСВАРЛАЖ, ӨНӨӨ ОРОЙ ЗАЛГАХ ГЭЖ БАЙНА 

"Дулааны цахилгаан станц-4" ТӨХК-ийн инженер, техникийн ажилчид дөрөвдүгээр зууханд гарсан гэмтлийг богино хугацаанд засварлаж дуусжээ. +70 градустай хүнд орчин нөхцөлд шуурхай ажилласан тус станцын гагнуурчид болон засварчдыг Ерөнхий сайд сайшааж, шагнаж урамшуулна гэж мэдэгдэв. 

Г.ЗАНДАНШАТАР: Өвлийн оргил ачааллын үед зуухын цехийнхэн, засварчид, гагнуурчид өндөр ачаалалтай ажиллаж байна. Ийм хүмүүсийнхээ хөдөлмөрийг үнэлдэг байх ёстой. Тиймээс илүү цагийн нэмэгдэл, урамшууллаас гадна цалин хөлсийг нь нэмэгдүүлж, тогтвортой ажиллах нөхцлийг бүрдүүлэх тал дээр салбарын яамыг шахаж ажиллана. 

"Дулааны цахилгаан станц-4" ТӨХК дангаараа Улаанбаатар хотын нийт цахилгаан эрчим хүчний 58 хувийг хангадаг. Найман зуухаар цагт 680 мВт эрчим хүч үйлдвэрлэдэг. Гэвч нэг зууханд гэмтэл гарснаар хязгаарлалт хийх зайлшгүй нөхцөл үүссэн байна. 

15 хүний бүрэлдэхүүнтэй шуурхай баг засварын ажлын хамгийн сүүлийн үе шат болох шугам хоолойн үзлэг хийж, шинэ гагнаасаа шалгаж өнөө оройн оргил ачааллаас өмнө зуухаа залгахаар ажиллаж байна. 

Гэхдээ гэмтлийг шуурхай засварлаж буй нь гал унтраасан арга гэж Ерөнхий инженер Д.Болдбаатар онцлов. Бэлтгэл нөөцгүй цахилгаан, эрчим хүч үйлдвэрлэж буй тохиолдолд хязгаарлалт дахин үргэлжлэх эрсдэлтэй. Тиймээс яаралтай шинээр есдүгээр зуух барих шаардлагатай гэв. 

Хоёр жилийн өмнө шинэ зуухны ТЭЗҮ-ийг батлуулжээ. Есөн зуухтай болсноор цахилгаан, эрчим хүчний найдвартай байдлыг хангаад зогсохгүй бэлтгэл тоноглолтой болж, гал алдах эрсдэл буурах юм. Мөн  бусад зууханд засвар үйлчилгээ хийх хугацаа наашлах зэргээр олон давуу тал бий болох юм байна. 

Ерөнхий сайд Г.Занданшатар “Дулааны цахилгаан станц-4” ТӨХК бэлэн байдлын горимд хэрхэн ажиллаж байгааг шалгав.