Live
НИЙГЭМ

НИК, “Петровис” ХХК-ийн гүйцэтгэх захирал Б.Байгалтуяа: Нийслэлд гурав хоногийн нөөцтэй байгаа

Уул уурхай хүнд үйлдвэрийн яамнаас шатахууны асуудлаар мэдээлэл хийлээ. Энэ үеэр НИК, “Петровис” ХХК-ийн гүйцэтгэх захирал Б.Байгалтуяа “Бид төвийн бүс болон нийслэлд 30 мянган төгрөгийн хязгаарлалттай борлуулалт хийж байна.

Манай компанийн хувьд төвийн бүсэд дөрөв, нийслэлд гурван хоногийн нөөцтэй байна. Иймээс эмнэлэг, цагдаагийн байгууллагад заавал шатахуун нийлүүлэх үүргийнхээ хүрээнд хязгаарлалт тавьж байна.

Нөөц бүрдүүлэлтийн хувьд найм, есдүгээр сард ОХУ-ын “Роснефть” компаниас захиалсан хэмжээгээр авч чадааагүй. Наймдугаар сард бид нийт захиалсан хэмжээнийхээ 7100 тонныг л авч чадсан. Есдүгээр сард нийт 17 мянган тонныг захиалсан боловч 3500 тонн өгөх боломжтой гэсэн хариу ирсэн. Гэвч өнөөдрийн байдлаар 1500 тонн авсан” гэлээ.

Гэрэл зургийг MPA.mn

Мөн тэрбээр “Петровис” компани АИ-92 бензинийг 2,050 төгрөгөөр борлуулж байна. Өртгөөсөө 123 төгрөгийн алдагдалтай явж байна. Өнөөдрийг хүртэл зөвхөн АИ-92 бензинтэй холбоотойгоор 28 тэрбум төгрөгийн алдагдалд орсон. Зах зээлийн хуулиараа явбал АИ-92 2,200 төгрөг дээр очих ёстой. Засгийн газраас Ковид-19-ийн нөхцөл байдлаас шалтгаалж, нийгмийн хариуцлагын хүрээнд үнээ барь гэж байгаа. Түүний дагуу үнээ барьж байна.

Нөөцийн нөхцөл байдал үнэ барьсантай холбоотой. Бид нар буцаад шатахуун авах бэлэн мөнгөгүй болсон. Алдагдлын 28 тэрбум төгрөгийн асуудал дээр Засгийн газар хариулах нь зүйтэй” гэлээ.

Хариулах


ШИНЭ МЭДЭЭ



Ангилал өөрчлөх бол дахин бүртгүүлнэ үү.

Дээш
Tweet