Трамп арлыг худалдаж авах сонирхолтой байгаагаа дахин илэрхийлсний дараа Дани Гренландын хамгаалалтыг чангатгахаа мэдэгдэв

АНУ-ын Ерөнхийлөгчөөр сонгогдсон Доналд Трамп Гренландыг худалдан авах сонирхолтой байгаагаа дахин илэрхийлснээс хойш хэдэн цагийн дараа Данийн засгийн газар арлын батлан ​​хамгаалах зардлыг их хэмжээгээр нэмэгдүүлэхээр болсноо зарлалаа.

Данийн Батлан ​​хамгаалахын сайд Троэлс Лунд Поулсен уг багцын дүнгийн талаар тодорхой мэдээлэл өгөөгүй ч орон нутгийн хэвлэлүүд ойролцоогоор 12-15 тэрбум крон буюу дор хаяж 1.5 тэрбум доллар байж магадгүй гэж тооцоолсон байна.

Үүгээр ажиглалтын хоёр шинэ хөлөг онгоц, хоёр шинэ холын зайн дрон, нохой чарганы хоёр баг худалдаж авахаар төлөвлөж байгаа аж.

Түүнчлэн нийслэл Нуук дахь Арктикийн командлалын бие бүрэлдэхүүний тоог нэмэгдүүлэх, Гренландын гурван үндсэн нисэх онгоцны буудлын нэгд “F-35” дуунаас хурдан сөнөөгч онгоц байрлуулахад зориулж шинэчлэх ажил багтжээ.

“Бид олон жилийн турш Арктикт хангалттай хэмжээний хөрөнгө оруулалт хийгээгүй. Одоо бид илүү хүчирхэг болгохоор төлөвлөж байна” гэж Поулсен мэдэгдэлдээ хэлсэн байна.

Трамп “Truth Social” платформоороо “Үндэсний аюулгүй байдал, дэлхий дахины эрх чөлөөний төлөө Америкийн Нэгдсэн Улс Гренландыг эзэмших, аралд хяналт тавих зайлшгүй шаардлагатай” гэж мэдэгдсэнээс хойш нэг өдрийн дараа Данийн зүгээс дээрх мэдэгдлийг хийжээ. 

Данийн автономит нутаг дэвсгэр болох Гренландад АНУ-ын сансрын томоохон байгууламж байрладаг бөгөөд Хойд Америкаас Европ хүрэх хамгийн дөт зам учраас АНУ-ын хувьд стратегийн ач холбогдолтой юм. Мөн ашигт малтмалын томоохон нөөцтэй.

Дани өнөөг хүртэл Гренланд дахь цэргийн хүчээ бэхжүүлэхэд тун хойрог хандаж ирсэн. Хэрэв тус улс нутаг дэвсгэрээ Хятад, Оросын болзошгүй халдлагаас хамгаалж чадахгүй бол АНУ эдгээр өсөн нэмэгдэж буй аюул заналхийллийн эсрэг бүс нутагт хяналтаа тогтоох шахалтаа улам бүр нэмэгдүүлж магадгүй юм.

Эх сурвалж: BBC