Зүүн Өмнөд Азийн өрсөлдөөний байгууллагуудын дээд хэмжээний уулзалтад илтгэл тавьж оролцлоо

Бүгд Найрамдах Солонгос Улсын Сөүл хотноо өнгөрөгч сарын 29-нд зохион байгуулагдсан Зүүн Өмнөд Азийн өрсөлдөөний байгууллагын дээд хэмжээний уулзалтад Монополын эсрэг газрын дарга Б.Билгүүн оролцон “Монгол Улсын зах зээлийн өрсөлдөөний хууль эрх зүйн орчин, тогтолцооны хөгжил дэвшил, тулгамдаж буй асуудал” сэдэвт илтгэл тавилаа.

Уулзалтад Монгол, Солонгос, Казахстан, Малайз, Узбекистан, Филиппин, Армен зэрэг орны өрсөлдөөний байгууллагын удирдлагууд орчин үеийн зах зээлийн өрсөлдөөний орчин, дижитал зах зээл дэх өрсөлдөөний асуудлууд, шинээр урган гарч буй сорилт, тулгамдсан асуудлын талаар хэлэлцүүлэг өрнүүлсэн байна.

Энэ удаагийн ASEAN-CIS-KFTC II дээд хэмжээний уулзалтыг Зүүн Өмнөд Азийн бүс нутгийн хамтын ажиллагааны нийгэмлэг, Тусгаар улсуудын хамтын нөхөрлөл болон Солонгосын Шударга худалдааны хороотой хамтран зохион байгуулсан юм.