Украин Крымийн хойг дахь нефтийн терминалд цохилт өгч, Орос дахин нэг сууринг хяналтдаа оруулжээ

Украины цэргүүд Крымийн хойгийн газрын тосны томоохон терминалд цохилт өгснийг Киев даваа гарагт мэдэгдэв.

Москвагийн түрэмгийллээ санхүүжүүлэхэд ашигладаг орлогыг бууруулах зорилгоор Киев сүүлийн саруудад Оросын эрчим хүчний салбарыг чиглэсэн цохилтоо эрчимжүүлээд байгаа.

Украины арми олон нийтийн сүлжээгээр дамжуулан “Өнгөрсөн шөнө Крымийн Феодосия дахь дайсны газрын тосны терминалд амжилттай цохилт өглөө” гэж мэдэгджээ.

Оросоос томилогдсон Крымийн эрх баригчид Хар тэнгисийн 70 мянга орчим хүн амтай боомт хотын газрын тосны байгууламжид гал гарсныг баталсан ч хүний ​​амь нас эрсдээгүй гэж мэдэгдэв.

Батлан хамгаалах яамны мэдээлснээр хойгийн дээр нисэж байсан Оросын байг чиглэсэн 21 довтолгооны дроны 12-ийг нь устгасан гэжээ.

“Феодосия терминал нь Оросын эзлэн түрэмгийлэгч армийн хэрэгцээг хангах зорилгоор нефтийн бүтээгдэхүүнийг шилжүүлэн ачдаг Крымийн хамгийн том терминал юм” гэж Украины арми мэдэгдээд, ийм төрлийн халдлагаа үргэлжлүүлнэ гэж мэдэгдэв.

Украины тал энэхүү цохилтыг эрчим хүчний дэд бүтцэд нь хийсэн дайралтаас болж олон сая хүн харанхуйд автсаны шударга хариу гэж тайлбарласан байна.

Энэ үеэр, Оросын Батлан ​​хамгаалах яам цэргүүд нь Украины зүүн хэсэгт стратегийн чухал ач холбогдолтой Покровск хотын ойролцоох Гродовка тосгоныг эзэлсэн болохыг мэдэгдэв.

Дайны өмнө 2,000 орчим хүн амтай байсан энэ суурин нь Донецк мужийн Покровскыг чиглэн урагшилж буй Оросын армийн хяналтдаа оруулсан хамгийн сүүлийн суурин болж байна.

Өнгөрсөн долоо хоногт Украины арми Донецк мужийн Вухледар хэмээх уул уурхайн хотоос ухарснаа мэдэгдсэн нь Оросын сүүлийн хэдэн долоо хоногт гаргасан хамгийн чухал ялалтуудын нэг болсон юм. 

Эх сурвалж: The Moscow Times