Ромын пап лам Индонезийн нийслэл Жакартад газардаж, Ази Номхон далайн бүс нутагт хийх түүхэн айлчлалаа эхлүүллээ

Ромын хамба лам Франциск Ази, Номхон далайн дөрвөн улсыг хамарсан түүхэн айлчлалынхаа хүрээнд өнөөдөр Индонезид хүрэлцэн ирлээ. Тэрээр дэлхийн хамгийн олон мусульман шашинтнууд амьдардаг Индонезид айлчилж буй гурав дахь пап лам болсон байна.

87 настай Франциск Жакартагийн Соекарно-Хатта нисэх онгоцны буудалд “ITA airways” компанийн захиалгат нислэгээр дагалдан яваа хүмүүс болон сэтгүүлчдийн хамт газарджээ.

Индонез улс айлчлалтай холбогдуулан хамгаалалтаа чангатгасан бөгөөд гурван өдрийн айлчлалын туршид 9,000 цагдаа, цэргийн албан хаагчийг дайчилсан байна.

Франциск Индонезид байх хугацаандаа нийслэлийн төв сүмд зочилж, ерөнхийлөгчийн үүрэгт ажлаа хүлээлгэн өгч буй Жоко Видодотой уулзаж, 70 мянга орчим хүнд зориулж мөргөл үйлдэнэ.

Ирэх өдрүүдэд нь Папуа Шинэ Гвиней, Зүүн Тимор, Сингапурт айлчлах бөгөөд байгаль орчны асуудал болон шашин хоорондын эв найрамдлын асуудалд анхаарлаа хандуулах төлөвтэй байна.

10 хоногийн хугацаатай энэхүү айлчлал нь хамба ламын Ватиканаас хамгийн урт хугацаагаар холдож буй тохиолдол аж. Тэрээр есдүгээр сарын 13-нд Ром руу буцна.

Эх сурвалж: BBC