Украины цэргүүд Оросын хилээс 30 километрийн гүнд нэвтэрснийг Москва хүлээн зөвшөөрөв

Өнгөрсөн долоо хоногт Украины явган цэргүүд Оросын Курск мужийн нутаг дэвсгэрт нэвтэрсэн бөгөөд Оросын армийн цэргүүд өдгөө зургаа дахь өдрөө тэдэнтэй тэмцэж байна.

Украины Ерөнхийлөгч Володимир Зеленьский өчигдөр оройн мэдэгдэлдээ халдлагыг анх удаа шууд хүлээн зөвшөөрчээ. Ингэхдээ энэ зун Орос улс Курскийн нутаг дэвсгэрээс 2,000 орчим удаа хил дамнасан халдлага үйлдсэн болохыг мэдэгдэв.

“Их буу, миномёт, нисгэгчгүй онгоц. Бид мөн пуужингийн цохилтыг бүртгэсэн бөгөөд ийм цохилт бүр шударга хариу хүртэх ёстой” гэж Зеленьский хэлсэн байна.

Украины өндөр албан тушаалтан мөн энэ ажиллагаанд олон мянган цэрэг оролцож байгааг хэлээд, Оросын хилчдийн анх мэдээлсэн жижиг дайралтаас хамаагүй том хэмээн залруулжээ.

“Зорилго нь дайсны байрлалыг сунгаж, байж болох хамгийн их хохирлыг учруулах, хилээ хамгаалж чадахгүй байгааг ашиглан Оросын нөхцөл байдлыг тогтворгүй болгох явдал юм” гэж албаны хүн хэлэв.

Украины дэмжлэгтэй хорлон сүйтгэх бүлгүүд үе үе хил дамнасан дайралт хийж ирсэн ч энэ удаагийн довтолгоо нь Киевийн хүчний Оросын нутаг дэвсгэрт хийж буй хамгийн том төлөвлөгөөт довтолгоо юм.

Ням гарагт Оросын Батлан ​​хамгаалах яам тус улсын хүчнийхэн “хуягт машин бүхий дайсны хөдөлгөөнт бүлэглэлийн Оросын нутаг дэвсгэрт нэвтрэх оролдлогыг таслан зогсоосон” хэмээн мэдээлжээ.

Гэвч цэргүүд нь Толпино, Общий Колодезь тосгоны ойролцоо Украины цэргүүдтэй тулалдаж байгааг мэдэгдсэн байна. Эдгээр тосгон нь Орос-Украины хилээс 25, 30 км-ийн зайд оршдог бөгөөд энэ нь Киевийн цэргүүд Курскийн гүнд нэвтэрсэн болохыг хүлээн зөвшөөрч буй нэг хэлбэр юм.

Үүнтэй зэрэгцэн, хилээс 25 км-ийн зайд орших Левшинка тосгоны ойролцоо Оросын хүчин цохилт өгч буйг харуулсан бичлэг олон нийтийн мэдээллийн хэрэгслээр тархсан байна.

Украины цэргүүд Курск мужийн хэд хэдэн сууринг эзэлснээ мэдэгдээд байгаа. Хилээс 3 орчим км зайд орших Гуево тосгоны засаг захиргааны байрнаас Оросын далбааг буулгаж буй бичлэгээ нийтэлсэн байна.

Мөн Украины цэргүүд Свердликово, Пороз дахь захиргааны барилгуудыг эзлэн авч байгаа бичлэгүүд онлайнд нийтлэгдсэн бол 5,000 орчим хүн амтай Суджа хотод ширүүн тулаан өрнөсөөр байна.

“BBC”-ийн сурвалжлагчдын мэдээлснээр Курск мужтай хиллэдэг Украины Сумы мужид хуягт тээвэрлэгч, танкнууд Оросыг чиглэн тасралтгүй хөдөлж байгааг мэдээлэв.

Курск мужид онц байдал зарласан бөгөөд хил орчмын бүс нутгаас 76 мянган хүнийг нүүлгэн шилжүүлсэн болохыг эрх баригчид мэдэгджээ.

Курскийн довтолгоо нь Украины зүүн хэсэгт хэдэн долоо хоног үргэлжилсэн довтолгооны дараа Кремлийн цэргүүд хэд хэдэн тосгоныг эзэлсний дараа болж байна.

Зарим шинжээчид Курскийн халдлагыг Оросыг Украины зүүн хэсгээс цэргээ эргүүлэн татахад хүргэж, Украины хүчинд үзүүлэх дарамт шахалтыг бууруулах зорилготой алхам гэж үзэж байна.

Эх сурвалж: BBC