Москвад автомашин дэлбэрсний улмаас Оросын цэргийн тагнуулын ажилтан шархаджээ

Лхагва гарагт Москвагийн хойд хэсэгт тэсрэх бөмбөг суурилуулсан машин дэлбэрч Оросын цэргийн тагнуулын газрын нэг офицер шархадсан болохыг “Коммерсант” сонин мэдээлжээ.

Оросын Дотоод хэргийн яамны мэдэгдэлд өгүүлснээр дэлбэрэлтийн улмаас хоёр хүн шархадсан бөгөөд эрүүгийн хэрэг үүсгэн шалгаж эхэлсэн байна.

Оросын хэвлэлд бичиж байгаагаар офицер болон нэр нь тодорхойгүй нэг эмэгтэйн хамт машинд суусны дараа “Toyota Land Cruiser” загварын машин дэлбэрсэн байна.

“Коммерсант”-ын мэдээлснээр шархадсан офицер Оросын Зэвсэгт хүчний жанжин штабын ерөнхий газарт алба хаадаг нэгэн аж.

Оросын Зэвсэгт хүчний жанжин штабын ерөнхий газар буюу хуучнаар Тагнуулын ерөнхий газар нь Зэвсэгт хүчний жанжин штабын гадаад тагнуулыг хариуцдаг алба юм.

Оросын аюулгүй байдлын албанд эх сурвалжтай “База” мөн дээрх мэдээллийг баталсан байна.

Харин төрийн мэдлийн “ТАСС” агентлаг дэлбэрэлтийн улмаас нэг офицер эхнэрийн хамт шархадсан гэж мэдээлжээ. Офицерын хөл тасарсан бөгөөд дэлбэрэлтэд өөр таван машин өртсөн гэж тус агентлаг мэдээндээ өгүүлсэн байна.

Эх сурвалж: Reuters