Оросын Аюулгүй байдлын алба террорист халдлага үйлдэхээр төлөвлөж байсан Беларусийн иргэнийг хөнөөжээ

Пүрэв гарагт Оросын Холбооны Аюулгүй байдлын алба (ФСБ) Оросын хойд хэсгийн Бүгд Найрамдах Карель Улсад Украины өмнөөс террорист халдлага үйлдэхээр төлөвлөж байсан Беларусь улсын иргэнийг буудан хөнөөжээ.

ЗХУ-ын үеийн КГБ-ын залгамжлагч гол байгууллага болох Аюулгүй байдлын алба нь хэргийн газраас зэвсэг, гар аргаар хийсэн тэсрэх бөмбөг хураан авсан байна.

“РИА” агентлагийн мэдээлснээр тухайн этгээд Финландын хилээс 250 км зайд орших Олонец хотын захиргааны байрыг дэлбэлэхээр төлөвлөж байжээ.

“Баривчилгааны үеэр гэмт этгээд тусгай албаны ажилтнууд руу галт зэвсгээр гал нээсэн тул саармагжуулсан” гэж Аюулгүй байдлын албанаас иш татан “РИА” мэдээлсэн байна. 

Тусгай ажилтнууд хотын алслагдсан дүүрэгт байрлах хуучирсан барилга руу нэвтэрч, “гараад ир” хэмээн хашхирч, дараа нь гал нээж буй дүрс бичлэгийг “РИА” агентлаг мөн нийтэлжээ. Тухайн этгээдийн цогцосны ойролцоо гар буй байгаа нь бичлэгт бичигдсэн байна.

Оросын хэвлэлүүд нэрээ нууцалсан эх сурвалжаас иш татан энэ хүнийг 2020 онд сөрөг хүчний эсэргүүцлийн жагсаалд оролцож байсан Беларусь улсын 49 настай идэвхтэн Николай Алексеев гэж тодорхойлжээ.

Эх сурвалж: Reuters