Б.Чинзориг: Миний бие спортын Арбитрын шүүхэд хандсан. Эцсийн шийдвэр гарсны дараа эргэн мэдээлэх болно

Гэрэл зургийг MPA.mn

"Ханжоу 2022" Азийн наадмын боксын 63.5 кг жинд аваргын алтан медаль хүртсэн Б.Чинзоригийн А сорьцоос допингийн төрлийн бодис илэрсэн талаар Олон улсын шинжилгээний агентлагаас мэдээлсэн билээ. Энэ асуудалтай холбогдуулан тэрбээр өчигдөр мэдээлэл өглөө. 

Азийн аваргын алт, мөнгө, хүрэл, Дэлхийн аваргын мөнгөн медальт, МУГТ Б.Чинзориг "Би 2005 оноос хойш боксын спортоор 18 дахь жилдээ хичээллэж байна. Энэ жил Узбекистанд болсон ДАШТ-ээс мөнгөн медаль авсан. Мэдээж хамгийн том зорилго Парисын олимп.

Энэ сард БНХАУ-д болсон "Ханжоу 2022" Азийн наадмын үеэр миний өгсөн шинжилгээнээс допингийн эсрэг дүрмийн зөрчил илэрсэнтэй холбогдуулан энэхүү мэдээллийг хийж байна. Анх мэдээ сонсоод шоконд орж, хэд хоног сэтгэл санаа хүнд, тогтворгүй байлаа.

Миний хувьд дэлхийн Допингийн эсрэг агентлагаас баталсан тамирчны эрхээ хамгаалах дүрмийн дөрөвдүгээр бүлэгт заасны дагуу уг хэргийг хянан шийдвэрлэх болон өмгөөлөгч авах хүсэлт тус байгууллагад тавьсан. Өөрөөр хэлбэл, олон улсын спортын Арбитрын шүүхэд хандаж байна. Надаас болж эрх нь зөрчигдсөн шигшээ багийн тамирчдаасаа уучлалт хүсье. Эцсийн шийдвэр гарсны дараа эргэн мэдээлэх болно" гэлээ.