Солонгос хоорондын хилийг давсан АНУ-ын иргэн Хойд Солонгост саатуулагджээ

Солонгос хоорондын хилийг зөвшөөрөлгүй давсан АНУ-ын иргэн Хойд Солонгост саатуулагдсан болохыг НҮБ-ын командлал мягмар гарагт мэдэгджээ.

Тодруулбал, АНУ-ын иргэн “Хамтарсан хамгаалалтын бүс”-д зочлохдоо “Цэрэггүй бүс”-ийн Хойд болон Өмнөд Солонгосын цэргүүд нүүр тулан зогсдог цорын ганц хэсгийг зөвшөөрөлгүйгээр давсан байна.

Өмнөд Солонгосын “Dong-a Ilbo” өдөр тутмын сонин Өмнөд Солонгосын армиас иш татан энэ хүнийг АНУ-ын армийн хоёрдугаар зэрэглэлийн цэрэг Травис Кинг гэгч болохыг мэдээлжээ.

НҮБ-ын командлал “Twitter” хуудсандаа “Хамтарсан хамгаалалтын бүстэй танилцах аялалд явсан АНУ-ын иргэн Бүгд Найрамдах Ардчилсан Солонгос Ард Улсын хилийн шугамыг зөвшөөрөлгүйгээр давсан. Бид түүнийг БНАСАУ-д саатуулагдсан гэж үзэж байгаа бөгөөд энэ хэргийг шийдвэрлэхийн тулд Хойд Солонгосын ардын армитай хамтран ажиллаж байна” гэж жиргэжээ.

АНУ-ын Төрийн департамент “АНУ-ын иргэдийг баривчлах, удаан хугацаагаар саатуулах ноцтой эрсдэл байсаар байгааг харгалзан” өөрийн улсын иргэдийг Хойд Солонгост нэвтрэхийг хориглосон байна.

АНУ-ын иргэн Отто Уормбиер 2015 онд Хойд Солонгосоор аялахдаа тус улсын эрх баригчдад саатуулагдсаны дараа Төрийн департамент уг хоригийг хэрэгжүүлж байв. Тэрээр 2017 онд шоронгоос суллагдан, ухаангүй байдалтайгаар АНУ-д буцаж ирснээсээ хэдхэн хоногийн дараа нас барсан юм.

Эх сурвалж: Reuters