Ирантай холбоотой бүлэглэл Сири дэх америк цэргүүдийн аминд хүрсний дараа АНУ-ын арми хариу цохилт өгчээ

Пүрэв гарагт Сирийн зүүн хойд хэсэгт Хассаке хотын ойролцоох АНУ-ын цэргүүдийн байрлаж байсан баазад нисгэгчгүй онгоцоор цохилт өгсний улмаас АНУ-ын нэг гэрээлэгч амь үрэгдэж, нэг гэрээлэгч болон таван америк цэрэг шархадсан талаар Пентагон мэдэгдсэн.

АНУ-ын тагнуулын байгууллага баазад цохилт өгсөн нисгэгчгүй онгоцыг Иранаас гаралтай гэж дүгнэсэн бөгөөд АНУ-ын Батлан хамгаалахын сайд Ллойд Остин халдлагыг үйлдсэн бүлэглэл Иран улсын Исламын хувьсгалт гвардын корпус (IRGC)-тай холбоотой болохыг мэдэгдсэн.

Уг халдлагын хариуд Ерөнхийлөгч Жо Байден Сирийн зүүн хэсэгт тэдгээр бүлэглэлүүдийн ашиглаж буй объектуудад нарийн цохилт өгөхийг зөвшөөрч, улмаар пүрэв гарагийн орой АНУ-ын арми Иран улсын “IRGC”-тэй холбоотой бүлэглэлүүдийн эсрэг агаарын цохилт өгсөн байна.

Сирийн Ирактай хил залгаа, газрын тосны орд газруудтай Дейр-эз-Зор стратегийн хотод болсон дэлбэрэлтийн дүрс бичлэг олон нийтийн сүлжээнд тавигджээ.

Сүүлийн саруудад Израилын агаарын довтолгооны бай болоод байгаа Ираны дэмжлэгтэй зэвсэгт бүлэглэлүүд болон Сирийн цэргүүд тус бүсийг хянадаг.

Эх сурвалж: Al Jazeera