“Patriot” агаарын довтолгооноос хамгаалах системийг Украинд ашиглаж эхэлжээ

Агаарын довтолгооноос хамгаалах “Patriot” системийг Украинд ашиглаж эхэлснийг Украины Батлан хамгаалахын сайд “Twitter” хуудсараа мэдэгдэв.

Алексей Резников “Украинд агаарын довтолгооноос хамгаалах ‘Patriot’ системүүд ирснээр манай тэнгэр илүү аюулгүй болж байна” гэж бичжээ.

Тэрээр мөн АНУ, Герман, Нидерландын засгийн газарт тусламж үзүүлсэнд талархал илэрхийлсэн байна. Резников 2021 оны наймдугаар сард буюу түрэмгийллээс өмнө АНУ-д айлчлахдаа “Patriot” системийг анх хүсэж байжээ.

Түрэмгийллийн эхний үе шатанд Украин улс агаарын довтолгооноос хамгаалах системээр дутмаг байсны улмаас Оросын агаарын довтолгоонд их хэмжээгээр өртөхөд хүрсэн.

Арванхоёрдугаар сард АНУ “Patriot” систем нийлүүлэх төлөвлөгөөгөө батлах хүртэл Украины засгийн газрын сайд нар ийм төрлийн пуужингийн систем нийлүүлэхийг холбоотнууддаа уриалсаар байсан юм.

Дараа нь нэгдүгээр сард Нидерландын засгийн газар мөн төрлийн системийг Украинд өгөхийг зөвшөөрч байв.

Эх сурвалж: Reuters