Л.ЭНХ-АМГАЛАН: Боловсролын салбарт хуурамч диплом үйлдвэрлэдэг СҮЛЖЭЭ үүссэн байна

БШУ-ны сайд Л.Энх-Амгалан 35 мянган багшийн дунд шалгалт хийхэд 800 орчим нь хуурамч дипломтой болох нь тогтоогдсон талаар өнгөрсөн долоо хоногт мэдээлсэн. Тэгвэл энэ талаар өнөөдөр дэлгэрэнгүй мэдээлэл хийлээ.

Энэ удаагийн шалгалтыг цэцэрлэг болон ЕБС-д хийсэн бөгөөд хуурамч дипломтой багш нарын дийлэнх нь бага ангийн багш байжээ.

БШУ-ны сайд Л.Энх-Амгалан хэлэхдээ "Дипломын дугаар давхардсан, овог нэр регистрийн дугаар өөрчилсөн зэрэг зөрчил их байна. Боловсролын бүртгэлгүй дипломын зөрчил 139 байгаа нь тухайн жилүүдэд их, дээд сургуульд хуваарилагдаагүй, бүртгэлд огт байхгүй дугаарыг бичиж хуурамч диплом дээр дугаар олгосон гэсэн үг. Ингэхдээ Боловсролын яамнаас олгогдоогүй, хүчингүй болсон дугаарыг ашиглаж үйлдэгдсэн байна.

Боловсролын байгууллагын буруутай үйл ажиллагаанаас үүдэлтэй зөрчил бас байна. Энэ бол диплом олгодог буюу төгсөлтийн тушаалгүй мөртлөө диплом бичээд өгчихдөг. Жишээ нь, “Газарчин” дээд сургууль гэх мэт сургуулиуд дээр ийм зөрчил илэрсэн. Тухайлбал, Завхан аймгийн нэг суманд долоо, хамгийн ихдээ 20 гаруй магистрийн дипломыг суралцаагүй хүүхдүүдэд олгосон байна.

14 хоногийн өмнө 21 их, дээд сургуулийн үйл ажиллагааг зогсоосон. Онцолж 13 сургуулийн үйл ажиллагааг зогсоосон талаар бид мэдээлсэн. Эдгээр сургуулийн үйлдсэн хамгийн том асуудал бол суралцаагүй хүүхдүүдэд бакалаврын, магистрын диплом олгосон асуудал байгаа.

Төгсөгчдөд олгосон бичиг баримтууд Боловсролын яамны дээд боловсролын системд хуурамч буюу зөрчилтэй дипломын шивэлт хийж баталгаажуулдаг. Гэтэл түүнийг албажуулж, баталгаажуулсан хууль бус асуудал гарсан.

Ерөнхийдөө нэг хэсэг нь хуурамчаар үйлддэг, нөгөө хэсэг нь баталгаажуулдаг, түүнийг системд бүртгэдэг сүлжээ үүссэн байх магадлалтай онц ноцтой үйлдлүүд гарлаа.

Баримт бичгийг хуурамчаар үйлдвэл Эрүүгийн хуулиар хариуцлага хүлээдэг. Тиймээс 724 зөрчилтэй асуудлыг бид ЦЕГ-д албан ёсоор шилжүүлж байна" гэсэн юм.

Дипломтой холбоотой зөрчил илэрсэн их, дээд сургуулиуд:

• МУИС
• МУБИС-ийн харьяа сургууль
• Хүмүүнлэгийн Ухааны их сургууль
• Маргад ДС
• Газарчин ДС
• Соёлын ДС
• Ховд их сургууль зэрэг 78 их, дээд сургууль байна.