Нобелийн шагналыг хүний хувьслын талаарх бүтээлээрээ генетикч Сванте Паабо хүртлээ

Шведийн генетикч Сванте Паабо хүний ​​хувьслын талаарх бүтээлээрээ Физиологи, анагаах ухааны салбарт 2022 оны Нобелийн шагналыг хүртлээ.

Орчин үеийн хүмүүсийн устаж үгүй ​​болсон төрөл төрөгсөд болох Неандертальчуудын генетикийн кодыг амжилттай тайлсных нь төлөө Нобелийн шагналын хороо түүнийг шагнасан байна.

Паабо өмнө нь Сибирээс олдсон 40 мянган жилийн настай хурууны ясны хэлтэрхийнээс ДНХ-ийн дарааллыг тогтоож, үл мэдэгдэх Денисован хэмээх гомининыг илрүүлснээрээ шуугиан дэгдээж байв.

Түүний бүтээл хүний хувьслын түүхийг судлах, мөн хүн төрөлхтөн дэлхий даяар хэрхэн тархсаныг судлахад үнэтэй хувь нэмэр оруулсан юм.

Бид хаанаас ирсэн юм бэ, бусад төрлүүд устаж үгүй ​​болсон ч яагаад бид, Хомо сапиенс амжилттай үлдэж чадсан юм бэ гэсэн хамгийн үндсэн асуултуудыг Шведийн генетикчийн бүтээлүүд хөнддөг.

Үр дүнд нь ихэвчлэн Европ болон Баруун Азид тархан суурьшиж байсан Неандертальчууд орчин үеийн хүн болон шимпанзенаас ялгаатай болохыг тогтоосон юм.

Нобелийн хороо “Хүн төрөлхтнийг устаж үгүй ​​болсон гомининоос ялгаж буй генетикийн ялгааг илрүүлснээр түүний нээлтүүд биднийг юугаараа онцгой хүн болохыг судлах үндэс суурь болж байна” хэмээн түүний бүтээлийг сайшаажээ.

Шинжлэх ухааны салбар дахь хамгийн нэр хүндтэй шагналын нэгд тооцогддог уг шагналыг Шведийн Каролинскийн хүрээлэнгийн Нобелийн хороо олгодог бөгөөд 10 сая Шведийн крон буюу 900,357 долларын мөнгөн шагнал дагалддаг.

Эх сурвалж: BBC