Наймдугаар сарын 15-наас Улаанбаатарт автомашиныг тэгш, сондгой дугаараар хөдөлгөөнд оролцуулна

Гэрэл зургийг MPA.mn

Хичээлийн шинэ жилийн бэлтгэл ажил болон НҮБ-ын Цөлжилттэй тэмцэх тухай конвенцын Талуудын XVII бага хурал (COP17)-тай холбогдуулан Улаанбаатар хотод автомашины улсын дугаарыг тэгш, сондгойгоор ангилан хөдөлгөөнд оролцуулах түр зохицуулалт хэрэгжүүлнэ.

Тодруулбал, 2026 оны наймдугаар сарын 15-наас есдүгээр сарын 12-ныг дуустал өдөр бүр 07:00-21:00 цагийн хооронд, бүсчлэл харгалзахгүйгээр улсын дугаарын тэгш, сондгойгоор автомашины хөдөлгөөнийг зохицуулах юм.

Сондгой тоогоор төгссөн улсын дугаартай автомашин наймдугаар сарын 15, 17, 19, 21, 23, 25, 27, 29, 31, есдүгээр сарын 3, 5, 7, 9, 11-ний өдөр хөдөлгөөнд оролцоно.

Тэгш тоогоор төгссөн улсын дугаартай автомашин наймдугаар сарын 16, 18, 20, 22, 24, 26, 28, 30, есдүгээр сарын 2, 4, 6, 8, 10, 12-ны өдөр замын хөдөлгөөнд оролцохоор зохицуулжээ.

Харин есдүгээр сарын 1-ний өдөр бүх автомашиныг хөдөлгөөнд оролцуулах юм.

Уг зохицуулалт нь Улаанбаатар хотын хэмжээнд бүсчлэлгүйгээр хэрэгжих бөгөөд хичээлийн шинэ жилийн үеийн замын хөдөлгөөний ачааллыг бууруулах, COP17 хурлын үеэр нийслэлийн зам тээврийн хэвийн үйл ажиллагааг хангах зорилготой аж.