Завхан аймгийн ойн хөнөөлт шавжтай тэмцэх ажил үргэлжилж байна

Завхан аймгийн Тосонцэнгэл, Тэлмэн, Их-Уул сумдын ойн санд тархсан ойн хөнөөлт шавжтай тэмцэх ажил 2026 оны 7 дугаар сарын 22-ны өдрөөс эхлэн төлөвлөгөөний дагуу үргэлжилж байна.

Тус ажлыг Засгийн газрын хэрэгжүүлэгч агентлаг Ойн газар захиалан хэрэгжүүлж байгаа бөгөөд гүйцэтгэгчээр "Мөнх ногоон жодоо" ХХК, "Мөнх ногоон ой" ХХК ажиллаж байна.
Ажлын явцад Тосонцэнгэл сум дахь Сум дундын ойн анги, Байгаль орчны хяналтын улсын байцаагч болон байгаль хамгаалагчид газар дээр нь хяналт тавин ажиллаж, төлөвлөгөөний хэрэгжилт, ажлын чанар, биологийн бэлдмэлийн хэрэглээнд тогтмол хяналт тавьж байна гэж БОУАӨЯ-аас мэдээлэв. 

Ойн хөнөөлт шавжтай тэмцэх арга хэмжээ нь ойн экосистемийн тэнцвэрт байдлыг хадгалах, мод, сөөгийг хөнөөлт шавжийн олшролоос хамгаалах, ойн эрүүл мэндийг сайжруулахад чиглэсэн чухал ажил юм.