ФОТО: ДАШТ-ий хүрэл медаль зүүсэн АГШИН

Гэрэл зургийг REUTERS агентлагийн эрхтэйгээр нийтлэв.

Английн шигшээ Францыг 6:4-өөр буулган авч, ДАШТ-ий хүрэл медалийн эзэн боллоо.

2026 оны хөлбөмбөгийн ДАШТ-ий хүрэл медалийн төлөөх тоглолтод Английн шигшээ баг Францыг 6:4-ийн харьцаатай буулган авч, тэмцээнийг гуравдугаар байраар өндөрлүүллээ.

Майамид болсон энэхүү тоглолтод Английн шигшээ эхний үеийг бүрэн давамгайлж, Деклан Райс, Эзри Конса болон Букайо Сакагийн хоёр гоолын ачаар 4:0-ийн харьцаатай тэргүүлэн завсарласан юм.

Гэрэл зургийг REUTERS агентлагийн эрхтэйгээр нийтлэв.

Хоёрдугаар үед Францын шигшээ Килиан Мбаппегийн хоёр, Брэдли Баркола болон Усман Дембелегийн нэг нэг гоолоор эргэн ирэхийг оролдсон ч Английн довтолгоо үр дүнтэй байж, Сака торгуулийн цохилтоос хет-трикээ гүйцээж, Жүд Беллингхэм нэмэлт цагт зургаа дахь гоолыг оруулснаар тоглолтын эцсийн оноог тогтоов.

Энэ тоглолтод Букайо Сака хет-трик хийж багаа ялалтад хөтөлсөн бол Килиан Мбаппе хоёр гоол нэмж, ДАШТ-ий түүхэн дэх нийт гоолын тоогоо 22 болгосноор шинэ амжилт тогтоосон байна. Мөн Жүд Беллингхэм энэ удаагийн дэлхийн аваргад долоо дахь гоолоо оруулж, Английн шигшээний нэг ДАШТ-д хамгийн олон гоол оруулсан тоглогч болсон юм.

Английн шигшээ ийнхүү 1966 онд дэлхийн аварга болсноос хойших хамгийн өндөр амжилтынхаа нэгийг үзүүлж, ДАШТ-ийг хүрэл медальтай өндөрлүүлсэн бол Францын шигшээ дөрөвдүгээр байрт шалгарлаа. Мөн энэ тоглолт Францын дасгалжуулагч Дидье Дешамын шигшээ багийг удирдсан сүүлчийн тоглолт болсон юм.

Гэрэл зургийг REUTERS агентлагийн эрхтэйгээр нийтлэв.

Эх сурвалж: Reuters