Украин Орос руу Их Британийн “Storm Shadow” далавчит пуужин харважээ

Лхагва гарагт Украин Оросын нутаг дэвсгэр рүү АНУ-ын “ATACMS” пуужин харваснаас нэг өдрийн дараа Британийн “Storm Shadow” далавчит пуужин харвасан байна.

Үүнийг Оросын дайны сурвалжлагчид “Telegram”-аар өргөнөөр мэдээлж, нэрээ нууцалсан албаны хүмүүс баталжээ.

“Telegram” хуудсанд нийтлэгдсэн бичлэгт Украины зүүн хойд хэсэгтэй хиллэдэг Курск муж руу харвасан пуужингийн дуу чимээ бичигдсэн байна.

Наад зах нь 14 том дэлбэрэлт сонсогдсон бөгөөд ихэнхийнх нь өмнө пуужинтай төстэй хурц шүгэл мэт чимээ мэт сонсогдох аж. Орон сууцны хороололд авсан нэг бичлэгт алсаас хар утаа гарч байгааг харуулсан байна.

Оросыг дэмжигч “Two Majors” сувгийн мэдээлснээр Украин Курскийн бүс нутаг руу 12 хүртэл тооны “Storm Shadow” харвасан бөгөөд пуужингийн хэсгүүдийг харуулсан зургуудыг хавсаргасан байна.

Их Британийн Ерөнхий сайдын хэвлэлийн төлөөлөгч Кейр Стармер энэ талаар тайлбар өгөхөөс татгалзав.

Их Британи өмнө нь Украинд 250 км-ээс дээш тусгалтай “Storm Shadow”-ыг зөвхөн Украины нутаг дэвсгэрт ашиглахыг зөвшөөрч байсан юм.

Киевийн засгийн газар барууны холбоотнуудаасаа Оросын гүн дэх байд цохилт өгөхийн тулд зэвсгийн хэрэглээнд тавьсан хязгаарлалтаа цуцлахыг шаардаж ирсэн бөгөөд эцэст нь АНУ-ын Ерөнхийлөгч Жо Байден албан тушаалаас буухаасаа хоёр сарын өмнө энэ долоо хоногт “ATACMS”-ийг ашиглах зөвшөөрлийг өгсөн билээ.

Москвагийн зүгээс энэ шийдвэрийг нь шүүмжлээд, нөхцөл байдлыг хурцатгасанд буруутгаад, АНУ-ыг дайны оролцогч тал гэж үзэхээ анхааруулаад байгаа. 

Харин Киев Москваг зэвсгийн хязгаарлалтыг далимдуулан Украины хотуудад залуурт бөмбөгөөр агаараас цохилт өгч ирсэн гэж буруутгаж байна.

Мөн барууны орнууд сүүлийн долоо хоногт Оросын тал Хойд Солонгосоос 10 мянга гаруй цэрэг авчирсан нь зайлшгүй хариу арга хэмжээ авах шаардлагатай үйл явдал хэмээн үзэж байна.

Эх сурвалж: Reuters