Хятад улс үерт нэрвэгдсэн хотуудад 316 сая ам.долларын тусламж үзүүлжээ

Хятад улс бараг хоёр долоо хоног үргэлжилсэн аадар борооны улмаас үерт автаж, хөрсний гулгалт үүссэн бус нутгуудад аврах ажиллагаа, яаралтай тусламж, гамшгийн төлөвлөлтөд зориулж 2.3 тэрбум юань буюу 316.4 сая ам.долларын санхүүжилт олгожээ. 

Хамгийн сүүлд өнөөдөр Сангийн яам болон Онцгой байдлын яамнаас Жэжян, Аньхой, Фүжянь, Жянши, Хубэй, Хунань, Гуйжоу, Гуандун мужид 496 сая юанийн тусламж үзүүлсэн байна.  

Өнгөрсөн долоо хоногт Ши Жиньпин дарга үер, байгалийн гамшгийн давтамж нэмэгдэж байгаа тул хүний ​​амь насыг авран хамгаалахын тулд бүх хүчин чармайлтаа гаргахыг эрх баригчдад уриалсан билээ.

Жил бүр болдог үерийн улирал эхэлснээр Хятадад үер болон хөрсний гулгалтаас болж олон арван хүн амь насаа алдаад байгаа. Энэ жил тус улсын өмнөд хэсэг үерт хамгийн их хохирол амсжээ.

Үргэлжилсэн аадар борооны улмаас гол мөрөн үерлэж, олон сая хүний ​​амь насанд заналхийлж байгаа тул хотын захиргаад яаралтай тусламжийн төлөвлөгөөгөө эрчимжүүлэхээс өөр аргагүйд хүрээд байна.

Хөх мөрний сав газрын ойролцоох хот, бүс нутгуудад хүчтэй аадар бороо орсноор ойр орчмын гол мөрөн, горхины усны түвшин ихээхэн эрсдэл, аюул учруулж болзошгүй түвшинд хүрчээ. 

Пүрэв гарагт Жянши мужийн албаны хүмүүс мужийн хойд хэсгийн зарим гол мөрөн, нууруудын усны түвшин хүчтэй аадар борооны улмаас хурдацтай нэмэгдэж, үер бууж, уулархаг хэсэгт хөрсний гулгалт үүсэж болзошгүй байгааг анхааруулсан байна.

Пүрэв гарагт Хунань мужийн төв Чанша хотод Шян, Лаодао голуудын усны түвшин дээд цэгтээ хүрэх төлөвтэй байна.

Энэ даваа гарагт Хятадын өмнөд хэсэгт орсон аадар борооны улмаас авто замууд гол мөрөн болон хувирч, явган хүний ​​газар доорх гарц, метроны хонгил усанд автжээ.

Эх сурвалж: Reuters