Монгол Улсын Ерөнхийлөгч У.Хүрэлсүхийн урилгаар Бүгд Найрамдах Беларусь Улсын Ерөнхийлөгч А.Г.Лукашенко Монгол Улсад төрийн айлчлал хийхээр хүрэлцэн ирлээ.

Ерөнхийлөгч А.Г.Лукашенко болон дагалдан яваа төлөөлөгчдийг Чингис хаан олон улсын нисэх онгоцны буудалд Гадаад харилцааны сайд Б.Батцэцэг, БНБУ-ын Гадаад хэргийн сайд С.Ф.Алейник болон албаны бусад хүн угтан авав.

 

Ерөнхийлөгч А.Г.Лукашенкогийн манай улсад хийж буй энэ айлчлал Монгол Улс, БНБУ-ын хооронд дипломат харилцаа тогтоосноос хойш Төрийн тэргүүний түвшинд хийж буй анхны айлчлал юм.

Айлчлалын үеэр хоёр улсын Ерөнхийлөгч албан ёсны хэлэлцээ хийж, Засгийн газар, байгууллага хоорондын арав гаруй баримт бичигт хоёр тал гарын үсэг зурна.

Мөн Монгол-Беларусийн бизнес форум зохион байгуулахаар төлөвлөж байна.

 

 

 

Беларусийн Ерөнхийлөгч А.Г.Лукашенкогийн намтар: 

• Беларусь Улсын Ерөнхийлөгч бөгөөд тус улсын Зэвсэгт хүчний Ерөнхий командлагч, Бүгд Найрамдах Беларусь Улсын Үндэсний Аюулгүй байдлын Зөвлөлийн тэргүүн А.Г.Лукашенко 1954 оны наймдугаар сарын 30-ны өдөр Витебск мужийн Копысь хотод төржээ.
• Тэрбээр 1975 онд А.А.Кулешовын нэрэмжит Могилёв хотын Улсын Багшийн их сургуулийг түүхч мэргэжлээр, 1985 онд Беларусийн Хөдөө аж ахуйн академийг эдийн засагч мэргэжлээр тус тус төгссөн байна. 

Ажилласан байдал:

• 1975-1977 онд Баруун хилийн тойргийн Улс төрийн хэлтсийн зааварлагч
• 1977-1990 онд Могилёв хотын хүнсний худалдааны хэлтсийн комсомолын хорооны нарийн бичгийн дарга, Октябрь дүүргийн гүйцэтгэх хорооны зааварлагч, Шклов хотын “Мэдлэг” нийгэмлэгийн хариуцлагатай нарийн бичгийн дарга, цэргийн ангийн улс төрийн асуудал эрхэлсэн орлогч дарга, Шклов дүүргийн “Ударник” хамтралын орлогч дарга, Шклов хотын барилгын материалын комбинатын орлогч дарга, В.И.Лениний нэрэмжит хамтралын намын хорооны нарийн бичгийн дарга
• 1987-1994 Шклов дүүргийн “Городец” нэгдлийн дарга 
• 1990 онд БНБУ-ын Ардын депутат, Засгийн газрын дэргэд байгуулагдсан Худалдааны байгууллагуудын үйл ажиллагааг судлах чиг үүрэгтэй Бүгд Найрамдах Беларусь Улсын Дээд Зөвлөлийн Хорооны дарга
• 1993 онд Авлигатай тэмцэх парламентын комиссын дарга
• 1994.07.10-нд БНБУ-ын Ерөнхийлөгчөөр 80.3 хувийн саналаар сонгогдсон.
• 2001.09.09-нд БНБУ-ын Ерөнхийлөгчийн сонгуульд 75.6 хувийн санал авч улиран сонгогдсон.
• 2006.03.19-нд БНБУ-ын Ерөнхийлөгчийн сонгуульд 83 хувийн санал авч гурав дахь удаагаа сонгогдсон.
• 2010.12.19-нд БНБУ-ын Ерөнхийлөгчийн сонгуульд 79.6 хувийн санал авч дөрөв дэх удаагаа сонгогдсон.
• 2015.10.11-нд БНБУ-ын Ерөнхийлөгчийн сонгуульд 83.5 хувийн санал авч тав дахь удаагаа сонгогдсон.
• 2020.08.09-нд БНБУ-ын Ерөнхийлөгчийн сонгуульд 80.1 хувийн санал авч, зургаа дахь удаагаа сонгогдсон.