АНУ зэвсэгт бүлэглэлийн хүчирхийллийн улмаас Хаити дахь ЭСЯ-ны ажилтнуудаа нүүлгэн шилжүүлэв

Зэвсэгт бүлэглэлийн хүчирхийлэл газар авч байгаа тул АНУ Хаити улсаас элчин сайдын яамны ажилтнуудаа онгоцоор нүүлгэн шилжүүлжээ.

Мөн нийслэл Порт-о-Пренс дэх төлөөлөгчийн газрынхаа хамгаалалтыг чангатгасан байна. 

Түүнчлэн ням гарагт Германаас Хаитид суугаа Элчин сайд Европын холбооны бусад төлөөлөгчдийн хамт Доминикан руу явсан болохыг Германы Гадаад хэргийн яам мэдэгдэв.

Зэвсэгт бүлэглэлүүд Хаитигийн Ерөнхий сайд Ариэль Хенриг огцрохыг шаардаж, өнгөрсөн долоо хоногт нисэх онгоцны буудал, цагдаагийн газар, шорон руу бүлэглэн дайрсан юм.  

Эрх баригчид гурав хоног үргэлжлэх онц байдал зарласан ч нөхцөл байдал улам дордсон тул хугацааг нь нэг сараар сунгажээ.

Тус улсын гол боомт зэвсэгт бүлэглэлийн хорлон сүйтгэх ажиллагаа, эвдэн сүйтгэх ажиллагааны улмаас үйл ажиллагаагаа зогсоож байгаагаа пүрэв гарагт мэдэгдсэн байна.

Ерөнхий сайд Хенри өнгөрсөн долоо хоногт бүс нутгийн дээд хэмжээний уулзалтад оролцохоор Кени рүү явах үед бүлэглэлүүд хүчирхийллээ нэмэгдүүлсэн бөгөөд тэрээр мягмар гарагт Порт-о-Пренс рүү буцах гэж оролдсон боловч Хаитигийн олон улсын нисэх онгоцны буудал дахь нөхцөл байдлын улмаас хөрш Пуэрто Рикод газардсан юм.

Тэрээр айлчлалынхаа үеэр Ерөнхийлөгч Уильям Рутотой уулзсан ба Хаитид дэг журмыг сэргээхэд олон үндэстний хүчийг оролцуулах асуудлаар хэлэлцсэнээс хойш олон нийтэд ямар ч мэдэгдэл хийгээгүй байна. 

Хоёр удирдагч Кенийн 2,000 цагдааг Хаити руу илгээх замыг тодорхой болгосон харилцан гэрээнд гарын үсэг зурсан ч Кенийн сөрөг хүчний улстөрч уг гэрээг шүүхээр эсэргүүцнэ гэдгээ мэдэгджээ.

Бямба гарагт АНУ-ын Төрийн нарийн бичгийн дарга Антони Блинкен Кенийн ерөнхийлөгчтэй Хаитийн хямралын талаар ярилцаж, дэг журмыг сэргээхийн тулд үндэстэн дамнасан аюулгүй байдлын үүрэг амлалтаа онцолсон байна.

“G9” хэмээх гэмт бүлэглэлүүдийн холбоог удирдаж буй цагдаагийн ажилтан асан “Барбекю” хочтой Жимми Шеризер Хенриг огцрохгүй бол “иргэний дайн” үүсэж, энэ нь “геноцид”-ээр дуусна гэж анхааруулжээ.

Олон улсын цагаачлалын байгууллага (ОУОХ)-ын мэдээлснээр эмх замбараагүй байдлын улмаас 362,000 Хаитичууд гэр орноосоо дүрвэсэн байна.

Эх сурвалж: BBC