Хятадын Юньнаньд хөрсний гулгалтаас болж найман хүн нас барж, олон арван хүн сураггүй алга болжээ

Хятадын баруун өмнөд нутгийн Юньнань мужид болсон хөрсний гулгалтад 47 хүн дарагджээ.

Хөрсний гулгалт орон нутгийн цагаар даваа гарагийн 05:51 цагт Жаотун хотод болсон бөгөөд аврах ажиллагааны үр дүнд найман хүний цогцсыг нурангиас гаргасан бол олон арван хүн сураггүй хэвээр байна.

БНХАУ-ын дарга Ши Жиньпин “CCTV” телевизээр нийтэлсэн мэдэгдэлдээ орон нутгийн албаны хүмүүсийг аврах ажиллагааг яаралтай эрчимжүүлэхийг тушаажээ.

Мөн Хятадын цагаан сарын баяр ойртож байгаа энэ үед томоохон ослоос сэргийлэхийн тулд өндөржүүлсэн бэлэн байдалд байхыг Хятадын эрх баригчдад уриалсан байна.

Шалтгаан тодорхойгүй хэвээр байгаа ч Юньнань мужийн алслагдсан, уулархаг бүс нутагт хөрсний гулгалт олон тохиолддог.

500 гаруй хүнийг гэрээс нь нүүлгэн шилжүүлж, 1,000 орчим аврагч ослын газарт дайчлагдсан байна. Хятадын ерөнхий сайдын орлогч Жан Гуокин аврах ажиллагааг удирдан чиглүүлэхээр хэсэг бүлэг хүмүүсийн хамт ослын газарт очжээ.

Даваа гарагийн өглөө олон хүн унтаж байх үед хөрсний гулгалт болсон бөгөөд дарагдсан оршин суугчдын ихэнх нь хөгшин настай хүмүүс болон хүүхдүүд болохыг тосгоны нэг оршин суугч орон нутгийн хэвлэлд ярьсан байна.

Хамгийн сүүлд 2013 оны нэгдүгээр сард тус мужид хөрсний гулгалтаас болж дор хаяж 18 хүн амиа алдаж байжээ.

Эх сурвалж: BBC