“Forbes” сэтгүүл Мэжик Жонсоныг тэрбумтан болсныг зарлалаа

“Forbes” сэтгүүл сагсан бөмбөгийн од асан Мэжик Жонсоныг тэрбумтан болсныг зарлажээ. Тодруулбал, бизнес сэтгүүл түүний хөрөнгийг ойролцоогоор 1.2 тэрбум гэж үнэлсэн байна.

Жонсоноос гадна “NBA”-ийн тоглогчид болох Майкл Жордан, Леброн Жэймс, гольфчин Тайгер Вудс нарын цөөн хэдэн тамирчин тэрбумтнуудын жагсаалтад багтдаг.

Өдгөө 64 настай тэрээр 1996 онд зодог тайлахаасаа өмнө “NBA”-ийн түүхэн дэх хамгийн гайхалтай карьеруудын нэгийг бүтээсэн ч ихэнх хөрөнгөө спорт бус, өөр салбараас босгосон байна.

“Forbes”-ын мэдээлснээр Жонсон нь “NBA”-ийн карьераасаа 40 сая ам.долларын ашиг олж байжээ.

Жонсон “MLB”-ийн “Los Angeles Dodgers” зэрэг Лос Анжелес хотод төвтэй гурван спортын багт хувьцаа эзэмшдэг.

Спортоос гадна “Starbucks”, “Burger King”, “24 Hour Fitness” болон өөр олон компанид хөрөнгө оруулалт хийж байсан ч амь даатгалын “EquiTrust” компанид эзэмшиж буй хувьцаа нь түүний хөрөнгийн ихэнх хувийг эзэлж байгааг “Forbes” тэмдэглэжээ.

Жонсон 1970-аад онд “NBA”-д орж байхдаа “Nike”-ийн хувьцаанаас татгалзаагүй бол эрт тэрбумтан болох байсан гэж “Forbes” дүгнэсэн байна. Тухайн үед тэрээр жилд 100 мянган ам.доллар санал болгосон “Converse”-тэй гэрээ байгуулсан юм.

Тэрээр энэ талаар “Манай гэр бүл мөнгөтэй байгаагүй. Мөнгөгүй байсан учраас би тэр үед хувьцаа гэж юу байдгийг ч мэддэггүй байсан. Тиймээс би хувьцаанаас татгалзсан юм. Төсөөлж байна уу? Тэр хувьцаа 45 жилийн дараа 5 тэрбум долларын үнэд хүрэх байж шүү дээ” гэж энэ оны эхээр “All The Smoke” подкастад ярьсан байна.

Эх сурвалж: BBC