Ковид-19-ийн эсрэг вакцин бүтээхэд чухал үүрэг гүйцэтгэсэн Карико, Вайсман нар Нобелийн шагнал хүртлээ

Каталин Карико, Дрю Вайсман нарын эрдэмтэд Ковид-19-ийн вакциныг бүтээхэд хүргэсэн нээлтүүдээрээ 2023 оны физиологи, анагаах ухааны салбарын Нобелийн шагнал хүртсэнийг шагнал гардуулах хороо даваа гарагт мэдэгдэв.

Шинжлэх ухааны салбар дахь хамгийн нэр хүндтэй тус шагналыг Шведийн Каролинскийн хүрээлэнгийн анагаах ухааны их сургуулийн Нобелийн Ассамблей шалгаруулдаг бөгөөд 11 сая Шведийн крон буюу 1 сая орчим долларын мөнгөн шагнал дагалддаг.

“2023 оны Физиологи, анагаах ухааны салбарын Нобелийн шагналыг Каталин Карико, Дрю Вейсман нарт Ковид-19-ийн эсрэг үр дүнтэй мРНХ-ийн вакцин бүтээх боломжийг олгосон нуклеозидын суурь өөрчлөлтийн талаарх нээлтүүдийнх нь төлөө олгов” гэж тус байгууллага мэдэгдэлдээ дурдсан байна.

Энэ жилийн Нобелийн шагнал анагаах ухааны салбараар эхэлж байгаа ба бусад таван салбарын шагналтнуудыг ойрын өдрүүдэд зарлах болно.

Уг шагналыг тэсрэх бодис зохион бүтээсэн, Шведийн чинээлэг бизнесмен Альфред Нобель санаачилсан бөгөөд 1901 онд анх гардуулж байв. Шагналыг шинжлэх ухаан, уран зохиол, энх тайвны салбарын ололт амжилтад олгож байсан бол дараагийн жилүүдээс эдийн засгийн салбарт мөн олгож эхэлсэн.

Арванхоёрдугаар сарын 10-нд Шведийн хаан Стокгольм хотноо Нобелийн таалал төгссөн ойн өдрөөр болох ёслолын ажиллагааны үеэр шагналыг гардуулж, дараа нь тансаг цайллага зохион байгуулна.

Өнгөрсөн жилийн анагаах ухааны салбарын шагналыг өнөөгийн хүмүүсийн устаж үгүй болсон төрөл төрөгсөд болох Неандертальчуудын геномыг эрэмбэлж, урьд өмнө нь мэдэгдэж байгаагүй хүний төрөл төрөгсөд болох Денисованчуудыг олж илрүүлснийхээ төлөө Шведийн Сванте Паабо хүртсэн юм.

1945 онд пенициллинийг нээсэн Александр Флеминг, 1930 онд хүний цусны бүлгийг нээсэн Карл Ландштайнер нар мөн шинжлэх ухааны салбарт уг шагналыг хүртэж байжээ.

Эх сурвалж: Reuters