Нидерландын засгийн газар хичээлийн танхимд гар утас ашиглахыг хориглолоо

Нидерландын засгийн газар гар утас зэрэг төхөөрөмжүүдийг анги танхимд оруулахыг хориглох шийдвэр гаргажээ.

Уг санаачилгыг сургуулиудтай хамтран хэрэгжүүлж байгаа бөгөөд ирэх оноос хэрэгжиж эхлэх гэнэ.

Эрүүл мэндийн зайлшгүй шаардлага эсвэл хөгжлийн бэрхшээлтэй сурагчид, дижитал ур чадварын хичээл зэрэг зарим тохиолдолд уг хориг үл хамаарах аж.

Боловсролын сайд Робберт Дейкграаф “Хэдийгээр гар утас бидний амьдралтай бараг салшгүй холбоотой ч анги танхимд хэрэгцээ байхгүй. Сурагчдыг анги танхимд анхаарлаа төвлөрүүлж, сайн сурах бүх боломжоор хангах ёстой. Харин гар утас үүнд саад болдог нь судалгаагаар батлагдсан” гэж шийдвэрийг танилцуулахдаа мэдэгджээ.

Хүүхдийн дэлгэцийн цагийг хязгаарлах нь танин мэдэхүйн, төвлөрөх чадвар сайжрахад нөлөөлдөг болохыг олон судалгааны үр дүн харуулсан.

Уг хоригт таблет, ухаалаг цаг зэрэг бусад төхөөрөмжүүд мөн багтсан байна.

Сургуулиуд багш, эцэг эх, сурагчидтай зөвшилцөн, тодорхой дүрэм тогтоох боломжтой. Тэр дундаа сургуулиудад ийм төхөөрөмжийг ашиглахыг бүр мөсөн хориглох эрхтэй байна.

2024-2025 оны хичээлийн жилийн төгсгөлд энэ хориг хэр үр дүнтэй байсан, хууль болгон батлах шаардлагатай эсэх талаар үнэлэлт дүгнэлт хийх аж.

Финланд улс мөн өнгөрсөн долоо хоногт ижил шийдвэрээ танилцуулсан.

Сургууль доторх утасны хэрэглээг хязгаарлахад хялбар болгох үүднээс хуульд нэмэлт өөрчлөлт оруулахаа тус улсын засгийн газар мэдэгдсэн байна.

Англи, Франц зэрэг Европын бусад орнууд ч мөн суралцах чадварыг сайжруулахын тулд гар утсыг хориглох талаар хэлэлцэж эхэлжээ.

Эх сурвалж: BBC