ГАНДАНТЭГЧЭНЛИН ХИЙД: Зургаадугаар сарын 1-нд хийдэд "Хүүхдийн баярын өдөрлөг" зохион байгуулна

Бурхан багшийн их дүйчэн өдрийг угтан нийтэд нээлттэй олон улсын эрдэм шинжилгээний хурал болон хүүхдийн баярын өдөрлөгийг зохион байгуулах талаар мэдээлэл хийлээ.

Эрдэм шинжилгээний хурал энэ сарын 28-ны бямба гарагийн 10:00 цагт МБШТ Гандантэгчэнлин хийдийн Батцагаан дуганы А танхимд болох аж.

“Бурхан багшийн сургаал дэлхий дахинд” ОУ-ын эрдэм шинжилгээний хуралд:

• Азийн Буддист Энх Тайвны Бага хурлын Энэтхэг, Шри Ланк, Непаль, Вьетнамын үндэсний төвийн төлөөлөгчид,
• АНУ-ын Монтанагийн Их Сургуулийн Байгаль Орчны Түүхч, доктор Betsy Quammen,
• Wolverine Foundation-гийн Гүйцэтгэх Захирал Rebecca Watters,
• Асралт ТББ-ын УЗ-ийн гишүүн, зөвлөх Yuеli Minder болон МБШТ Гандантэгчэнлин хийд, МБШИх сургууль, МУИС-ын эрдэмтэн судлаач нар оролцоно.

Эрдэм шинжилгээний хурлын зохион байгуулагчид:

• Азийн Буддистуудын Энх Тайвны Бага Хурал,
• МБШТ-Гандантэгчэнлин Хийд,
• Монголын Сүсэгтний Холбоо НҮТББ
• Бурхан багшийн их дүйчэн өдрийг зохион байгуулах ажлын хэсэг

Харин хүүхэд багачуудад зориулсан өдөрлөгийг зургаадугаар сарын 1-ний өдөр МБШТ Гандантэгчэнлин хийд дээр зохион байгуулна. Өдөрлөг олон нийтэд нээлттэй тул хүссэн хүүхэд бүр оролцох боломжтой.

Өдөрлөгөөр:

- Эрийн гурван наадам

- Уламжлалт тоглоом

- Дугуй, скүтерны уралдаан

- Шатар, даамны уралдаан

- Спорт аяга өрөлтийн уралдаан

- Баримлын шавраар бүтээл урлах тэмцээн

- Зургийн уралдаан

- Төвөд, хуучин монгол бичгийн цэвэр бичигтний уралдаан

- Шүлэг, дууны уралдааныг зохион байгуулах аж.