Засгийн газар 20 гаруй асуудал хэлэлцэж байна

Засгийн газрын ээлжит хуралдаан өнөөдөр болж, 20 гаруй асуудал хэлэлцэж эхлээд байна.

Хуралдаанаар Улсын нөөцийн тухай хуульд нэмэлт, өөрчлөлт оруулах тухай хуулийн төсөл, Монгол Улс-БНСУ-ын Засгийн газар хоорондын Хамтарсан хорооны Х хуралдааны тухай асуудлыг хэлэлцэнэ.

Мөн УИХ-ын гишүүдийн санаачилсан дараах хуулийн төслүүдэд Засгийн газраас өгөх санал, дүгнэлтийг хэлэлцэхээр байна. Үүнд:

-Төсвийн тухай хуульд нэмэлт, өөрчлөлт оруулах тухай;

-Авлигын эсрэг хуульд нэмэлт, өөрчлөлт оруулах тухай;

-Кибер сөрөн тэсвэрлэх тухай хуулийн төсөл;

-Усны тухай хуулийн шинэчилсэн найруулгын төсөл.

Түүнчлэн зарим боомтод газрын тосны бүтээгдэхүүний гаалийн албан татварын хувь хэмжээг ялгавартай тогтоох тухай Засгийн газрын тогтоолын төсөл, хувийн нэмэлт тэтгэврийн тухай анхдагч хуулийн төсөлтэй хамт өргөн мэдүүлсэн холбогдох хуулийн төслүүдийг татан авах асуудлыг хэлэлцэнэ.

Мөн Италийн Милан хотод зохион байгуулагдах “Дэлхийн эртний өв, Афро-Евразийн орон зайн соёлын огтлолцол МЭӨ-800” үзэсгэлэнд оролцохтой холбоотой түүх, соёлын хосгүй үнэт дурсгалт зүйлийг улсын хилээр нэвтрүүлэх асуудлыг хэлэлцэх юм.

Үүнээс гадна “Биокомбинат” ТӨХК-ийн дотоодын үйлдвэрлэлийг нэмэгдүүлэх, “Хөвсгөл дулааны станц” ТӨХК-ийн их засварт хөрөнгө гаргах, томуу, томуу төст өвчний дэгдэлтийн үед хэрэгжүүлэх арга хэмжээ болон 2026 оны эхний хагас жилийн иргэдээс төрийн байгууллага, албан тушаалтанд гаргасан өргөдөл, гомдлын шийдвэрлэлтийн талаар хэлэлцэнэ.