ДЭЛХИЙН МЭДЭЭ

АНУ вакцины бүрэн тунд хамрагдсан аялагчдад зориулж газрын хилээ нээнэ

АНУ ирэх арваннэгдүгээр сард Ковид-19 цар тахлын улмаас 19 сарын хугацаанд хаалттай байсан газрын хилээ нээж, вакцины бүрэн тунд хамрагдсан аялагчдыг нэвтрүүлэхээр болжээ. Нэрээ нууцлахыг хүссэн захиргааны дээд албан тушаалтан албан ёсны мэдэгдлээс өмнө шинэ бодлогыг мягмар гарагт урьдчилж хэвлэлд мэдээлсэн байна.

АНУ, Канад, Мексик хоорондын тээврийн хэрэгсэл, төмөр зам, усан онгоцоор хийгддэг худалдаа наймаа зэрэг чухал шаардлагатай хөдөлгөөнийг цар тахлын анхны өдрүүдээс хязгаарласан. Харин шинэ дүрмээр арваннэгдүгээр сараас эхлэн вакцинд бүрэн хамрагдсан гадаадын иргэдийг зорчих шалтгаанаас үл хамааран АНУ руу газрын хилээр нэвтрүүлэх боломжтой болж байна. Түүнчлэн нэгдүгээр сарын дунд гэхэд ачааны машины жолооч зэрэг АНУ-д нэвтрэх хүсэлтэй аялагчид бүрэн вакцинд хамрагдсан байх шаардлагатай болж байна.

Өнгөрсөн сард АНУ дотоодын нислэгийн хязгаарлалтыг цуцалсан бөгөөд агаарын хилээр нэвтрэх гадаадын иргэдэд зорчих шалтгаанаас үл хамааран бүрэн вакцинд хамрагдсан байх шаардлага тавина гэж мэдэгдсэн. Хоёр бодлого арваннэгдүгээр сарын эхээр хүчин төгөлдөр болох аж.

Албаны хүмүүсийн мэдээлж буйгаар АНУ-д автомашин, төмөр зам, гаталга онгоцоор орж ирж буй аялагчдаас АНУ-ын Гааль, хил хамгаалах албаны стандарт журмын хүрээнд вакцинжуулалтын статусыг асуух бөгөөд зарим тохиолдолд офицерууд вакцинжуулалтын нотолгоог баталгаажуулна гэв. Хилээр нэвтрэх үед шинжилгээ өгөх шаардлагагүй байна. Харин агаарын аялалын хувьд АНУ руу нисэхээс өмнө “Ковид-19”-ийн шинжилгээний сөрөг хариугаа нотлох шаардлагатай юм.

Өвчний хяналт, урьдчилан сэргийлэх төвийн мэдээлж байгаагаар зөвхөн АНУ-д хэрэглэж байгаа вакцин бус Дэлхийн Эрүүл Мэндийн Байгууллагаас баталсан вакцины аль нэгэнд бүрэн хамрагдсан аялагчдад шинэ дүрэм хамаарна гэв. Харин хоёр өөр вакцины тунг тариулсан хүмүүсийг хүлээн авах журмыг албан ёсоор журамлахаар ажиллаж байгаа гэжээ.

Ерөнхийдөө, шинэ журам нь аюул багатай улс орнуудад суурилсан хориг биш, харин хувь хүмүүсийн эрсдэлийн зэрэгт үндэслэсэн бодлого руу шилжиж байна.

Эх сурвалж: AP

Хариулах


ШИНЭ МЭДЭЭ



Ангилал өөрчлөх бол дахин бүртгүүлнэ үү.

Дээш
Tweet