ЗАСГИЙН ГАЗАР

Б.ЖАВХЛАН: Халамжаас хөдөлмөрт шилжих бодлогыг үе шаттайгаар хэрэгжүүлнэ

Гэрэл зургийг
MPA.mn

Засгийн газрын хуралдаанаа гарсан шийдвэрийг танилцууллаа. Энэ үеэр Сангийн сайд Б.Жавхлан мэдээлэл өглөө.

Тэрбээр “Өнөөдөр 2022 оны улсын нэгдсэн төсвийн төслийг хэлэлцэж, УИХ-д өргөн барихаар тогтлоо. Ирэх оны төсвийн онцлог бол 2019 оноос хойш үргэлжилж буй цар тахлын үеийн эдийн засгийн уналтыг тогтворжуулах зорилго тавьж буй төсөв боллоо. “Хөдөлмөр, бүтээмж, өсөлт” гэсэн уриатайгаар төсвийн шинэчлэлийн найман зорилт тавьж байгаа.

Үүнд:

  1. Хөгжлийн төслүүдийг эхлүүлэх, хүртээмжтэй өсөлтийг хангах, хөрөнгө оруулалтыг дэмжих замаар эдийн засгаа сэргээнэ
  2. Үр ашиг, ил тод байдал, хариуцлага өгөөжийг нэмэгдүүлэх замаар төрийн өмчит компаниудад бүтцийн шинэчлэл хийнэ
  3. “Ирээдүйн өв” сангаар баталгаажсан хуримтлалтай монгол хүүхэд, баялагтаа эзэн монголыг бий болгоно
  4. Халамжаас хөдөлмөрт шилжих бодлогыг үе шаттайгаар үргэлжлүүлнэ
  5. Хувийн хэвшил гүйцэтгэх боломжтой чиг үүргийг төр хэрэгжүүлдэг байхаас татгалзаж, стандарт, чанар, өрсөлдөөнд суурилсан үйлчилгээг төр худалдан авдаг тогтолцоонд шилжиж, төрийн албаны бүтцийг шинэчилнэ
  6. Төсвийн зарцуулалтын үр ашгийг сайжруулна. Тодруулбал, төр хэмнэлтийн бодлого хэрэгжүүлж, зардлыг оновчтой байдлаар дахин хуваарилж, төрийн үйлчилгээг цахимжуулна
  7. Хөрөнгө оруулалтын аргачлал, цахим системийн дагуу үнэлгээ хийгдсэн дэд бүтцийн төслүүдийг нэн тэргүүнд хэрэгжүүлж, урсгал болон ашиглалтын зардал өндөртэй хөрөнгө оруулалтыг санхүүжүүлэхгүй. Өөрөөр хэлбэл, үрэлгэн хөрөнгө оруулалтаас хөгжлийн хөрөнгө оруулалт руу шилжинэ
  8. Улаанбаатар хотын автозамын түгжрэлийг бууруулахад ирэх дөрвөн жил онцгой анхаарч ажиллана. Тиймээс улсын төсвөөс нийслэлийн төсөвтэй хамтран тодорхой санхүүжилт гарган томоохон бүтээн байгуулалтын ажлыг эхлүүлнэ.

Төсвийн найман шинэчлэл, зорилтыг  агуулсан төсвийн төслийг өргөн барихаар тогтлоо. Мөн макро эдийн засгийн тоо баримт дурдвал, эдийн засгийн өсөлт таван хувь, экспорт 8.7 их наяд, импорт 7.2 их наяд төгрөг байна. Бидний гол эрдэс баялгуудын үнэ сайн байгаа ч нүүрсний экспорт муу байна. Харин ирэх жил хамгийн боломжит дээд хэмжээгээр экспортлохыг зорьж байна” гэв.

Хариулах


ШИНЭ МЭДЭЭ



Ангилал өөрчлөх бол дахин бүртгүүлнэ үү.

Дээш
Tweet