Live
НИЙГЭМ

“Э.Бат-Үүлийг үнсэж биш өндөг шидэж угтана”

Гэр хорооллын дахин төлөвлөлтөд хамрагдсан ч газраа алдаж, хохирсон иргэдийн төлөөлөл өнөөдөр (2021.09.29) мэдээлэл хийлээ.

Баянзүрх дүүргийн IV хорооны иргэн Г.Эрдэнэбилэг:

Э.Бат-Үүл дахин төлөвлөлт нэртэйгээр 2014 оны зургадугаар сарын 4-нд “Их өргөө” гэх компанитай гэрээ байгуулж, манай газрыг чөлөөлсөн. Үүнээс хойш би долоон жил орох оронгүй, хаана амьдрахаа ч мэдэхгүй хохироод явж байна. Өдийг хүртэл бие муутай ээж болон хүүхдүүдээ дагуулаад айлаас айлын хооронд, түрээсийн байранд амьдарч ирлээ. Энэ хугацаанд миний ээж орон байртай болохоо хүлээсээр байгаад нас барсан. Орон байр8 газраа алдсан 184 хохирогч байгаагийн нэг нь би. Газрыг маань чөлөөлөөд, хашаа байшинг минь нураачихсан. Дээр нь орон сууц барьсан юм юу ч байхгүй. Орон сууцтай болгож өгнө гээд өч төчнөөн айлыг хохироосон. Э.Бат-Үүл ямар нүүрээрээ, ичих ч үгүй Сонгинохайрхан дүүрэгт нэр дэвшээд, УИХ-д орно гээд явж байдаг юм бол. Би бүр гайхаад байна. Сонгинохайрхан дүүргийн сонгогчдод хэрхэн хохирсон талаараа би хэлэх болно. Долоон жил цагдаа, шүүхээр явсан ч тусыг олоогүй. Одоо үнэхээр цөхрөнгөө барж байна. Хэдэн хүүхдээ чирээд айлаас айл хэсэж явах нь надад үнэхээр хэцүү байна. Энэ асуудлыг даруйхан шийдэж өгөхгүй бол Э.Бат-Үүл хаана мэдээлэл хийнэ тэр газарт нь очиж эсэргүүцлээ илэрхийлнэ. Хүү нь болох Б.Чулуудайтайгаа нийлээд бүхэл бүтэн долоон жил өчнөөн хүмүүсийг хохироогоод явж байхдаа яасан ичдэггүй юм бэ. Би цаашид өлсгөлөн зарлах тухай ч бодож байна” гэв.  

Гэрэл зургийг MPA.mn

Өөр нэгэн төлөөлөл “Би Баянзүрх дүүргийн XII хорооны оршин суугч н.Отгонбаяр гэдэг хүнийг төлөөлж ирсэн. Тэр хүн бол миний төрсөн ах. Ах маань 2013 онд “Гранд лаин” гэх компанитай гэрээ байгуулж, найман жил орон оронгүй явж байна. Газартаа очиж амьдаръя гэхээр хоосон сууринаас өөр юм байхгүй. Ингээд 2020 онд гуравдугаар шатны шүүхээр орж, “Гранд лаин” компани иргэдийг хохироосон нь үнэн болно гэх шийдвэр гарсан. Энэ компанийн захирал нь Э.Бат-Үүлийн хүү Б.Чулуудай. Ах маань харвалт өгөөд хэвтэрт орчихсон. Хэд хүртэл насалж, хэзээ байрандаа орохыг хэн ч мэдэхгүй шүү дээ. Ахыг минь найман жил орон гэргүй явуулчихаад, шүүх нь хүртэл баталгаа гаргачихаад байхад яагаад тэр хүн өдийг хүртэл санаа амар яваад байгаа юм бэ. Би ойлгохгүй байна. Гэтэл Э.Бат-Үүл Сонгинохайрхан дүүрэгт нэр дэвшиж байна. Дахиад хэдэн хүнийг орон гэргүй болгож, хохироох вэ. XII хорооны 48 оршин суугч орон оронгүй найман жил явж байна. Болохгүй бол би суулт зарлана. Э.Бат-Үүл хэлэхдээ “Сонгинохайрхан дүүргийн иргэд намайг үнсэж угтдаг” гэнэ лээ. Тэгвэл бид Э.Бат-Үүлийг үнсэж биш өндөг шидэж угтана” гэв.

Гэрэл зургийг MPA.mn

Хариулах


ШИНЭ МЭДЭЭ



Ангилал өөрчлөх бол дахин бүртгүүлнэ үү.

Дээш
Tweet