ДЭЛХИЙН МЭДЭЭ

Хятадын зүүн хойд хэсэгт цахилгааны хомсдол үүсжээ

Эхлээд үйлдвэрүүдэд тулгараад байсан цахилгааны хомсдлын асуудал орон сууцнуудад тархаж эхэлсний дараа Хятадын зүүн хойд нутагт цахилгаан эрчим хүчийг урьдчилан мэдэгдэлгүйгээр тасалж эхэлжээ. Ляонин, Жилинь, Хэйлунзян мужид амьдардаг хүмүүс халаалтгүй, лифт, гэрлэн дохио ажиллахгүй байгаа талаар олон нийтийн сүлжээнд бичсэн байна. Орон нутгийн хэвлэл мэдээллийн хэрэгслүүд нүүрсний үнийн өсөлт нь хомсдол үүссэнтэй холбоотой гэж мэдээлсэн байна. Тус улс эрчим хүч нүүрснээс ихээхэн хамааралтай байдаг.

Цахилгаан эрчим хүчний нэг компани цахилгааны хязгаарлалт ирэх оны хавар хүртэл үргэлжлэх бөгөөд гэнэтийн тасалдал нь шинэ хэвийн байдал болно гэж хэлжээ. Удалгүй нийтлэлийг устгасан байна.

Эрчим хүчний хомсдол нь эхлээд улс даяар үйлдвэрлэгчдэд нөлөөлсөн бөгөөд тэдний ихэнх нь сүүлийн хэдэн долоо хоногт үйлдвэрлэлээ хязгаарлах эсвэл зогсоох шаардлагатай болжээ. Харин энэ амралтын өдрүүдэд зарим хотуудын оршин суугчид цахилгаан эрчим хүч үе үе тасалдаж байгааг мэдээлж, нийгмийн сүлжээний твиттер болон Weibo платформ дээр уг асуудал тренд болж байна. Одоогоор цахилгаан эрчим хүчний хангамжийн хязгаарлалт хэр хугацаанд үргэлжлэх нь тодорхойгүй байгаа ч гурван мужид 100 сая орчим хүн амьдарч байна.

Ляонин мужид агааржуулагч гэнэт ажиллахаа больсноос болж үйлдвэрийн 23 ажилтан угаартаж, нүүрстөрөгчийн ислийн хордлогод орж, эмнэлэгт хүргэгджээ. Мөн агааржуулалт муутай өрөөнд цахилгаан зуух ажиллуулж дулаацаж байсан хүмүүс эмнэлэгт хүргэгдсэн гэх мэдээлэл байна.

Хятадын хэвлэл мэдээллийн хэрэгслээр цацагдаж буй нэг видеон дээр гэрлэн дохио, гудамжны гэрэл унтарсан тул Шэньян хотын хөл хөдөлгөөн ихтэй хурдны замын нэг талд машинууд бүрэн харанхуйд явж байгааг харуулжээ.

Жилинь мужийн захиргаанаас нүүрсний хомсдлыг арилгахын тулд Өвөр Монголоос илүү их хэмжээгээр нүүрс авахаар ажиллаж байгааг мэдэгдэв. Шаньдун, Гуандун, Жянсу зэрэг үйлдвэрлэлийн бааз зэрэг бусад 10 мужийн үйлдвэрүүдэд цахилгааны хязгаарлалт хэдийнээ хийгджээ.

Эх сурвалж: BBC

Хариулах


ШИНЭ МЭДЭЭ



Ангилал өөрчлөх бол дахин бүртгүүлнэ үү.

Дээш
Tweet