Б.Баттүшиг: ОУОХ-оос гишүүдээ гэр бүлийнх нь хамт олимпд оролцох боломжийг хангаж, мандат олгон, зардлыг нь даадаг

ОУОХ-ны Гишүүн, МҮОХ-ны Ерөнхийлөгч Б.Баттүшигийг "Парисын олимп руу улсын зардлаар гэр бүлээ дагуулж явсан, тамирчдын мандатнаас авсан" гэх шүүмжлэл цахим орчинд тараад буй. Тэгвэл тэрбээр дараах тайлбарыг өглөө.

-ОУОХ-оос гишүүдээ гэр бүлийнх нь хамт олимпын наадамд оролцох боломжийг хангаж, мандат олгон, зардлыг нь даадаг. Парист ирсэн манай гэр бүлийн гишүүд шигшээ багт хуваарилагдсан мандат, эрхийг эдлээгүй гэдгийг хариуцлагатайгаар мэдэгдье.

Олимпын наадмын журмын дагуу албаны хүмүүсийн тоог эрх авсан тамирчдын тоотой уялдуулж олгодог. Парист 32 тамирчин оролцож буй тул бидэнд албан ёсоор 16 албаны мандат оногдсон гэсэн үг. Үүнд тааруулан багаа бүрдүүлж, нэрсээ ирүүлэхийг бид холбоодоос хүсэж, холбоодын ирүүлсэн мэдүүлгийн дагуу мандат захиалдаг. Бид холбоодтой мандатыг тодорхой хугацааны дараагаар солих (transferable) зэргээр оролцоог нэмэгдүүлэхээр хамтран ажилладаг гэлээ.