УЛС ТӨР

Нийслэлд хийх томоохон бүтээн байгуулалтын талаар санал солилцлоо

Нийслэл Улаанбаатар хотын эрх зүйн байдлын тухай хуулийг өнгөрсөн долдугаар сард УИХ-аар шинэчлэн баталсан. Үүнтэй холбоотойгоор шинээр батлагдсан хууль тогтоомжид нийслэл, дүүргийн чиг үүрэгт орсон нэмэлт өөрчлөлтүүд, нийслэлийн хөгжлийн бодлого төлөвлөлтийн баримт бичиг, хөрөнгө оруулалтын ажлын явц, нийслэлийн төсөв санхүүгийн өнөөгийн байдал, 2022 оны төсвийн төсөөлөл, ирэх онд хийх бүтээн байгуулалтын ажлуудын талаар санал солилцох уулзалт боллоо. Уулзалтад Нийслэлийн Засаг даргын орлогч, зөвлөх нар болон Улаанбаатар хотын Ерөнхий менежер бөгөөд Захирагчийн ажлын албаны дарга Т.Гантөмөр, НЗДТГ-ын хэлтсийн дарга нар оролцсон юм.

Уулзалтын эхэнд нийслэлийн хөгжлийн бодлого төлөвлөлтийн баримт бичгийн талаар НЗДТГ-ын Хөгжлийн бодлого, төлөвлөлтийн хэлтсийн дарга А.Мөнхболд танилцууллаа. Тэрбээр нийслэлийн хөгжлийн төлөвлөгөө, стратегийг боловсруулж байгааг хэлсэн юм. Үүний дараа Нийслэлийн Засаг даргын орлогч нар 2022 онд хийх томоохон хөрөнгө оруулалт, бүтээн байгуулалтын ажлуудыг танилцуулж, санал солилцов. Тухайлбал, Нийслэлийн Хот байгуулалтын асуудал хариуцсан төслүүдийн удирдагч Б.Сүхбаатар “Нийслэлд 47 байршилд хэсэгчилсэн ерөнхий төлөвлөгөө хийхээс 27-д нь хийсэн. 20 байршилд нь хэсэгчилсэн ерөнхий төлөвлөгөө хийх шаардлагатай байна. Үүнд болон гэр хорооллын дахин төлөвлөлт, ашиглалтын шаардлага хангахгүй байрыг буулган дахин барих төсөлд төсөв хэрэгтэй байгаа” хэмээв. Мөн гэр хорооллын шинэчилсэн зохион байгуулалт хийх шаардлагатай байгааг онцолсон.

Нийслэлийн Зам, тээврийн асуудал хариуцсан төслүүдийн удирдагч Б.Одсүрэн “Улаанбаатар хотын хамгийн тулгамдсан асуудал бол түгжрэл. Тиймээс Засгийн газраас үүнд онцгойлон анхаарч байгаа. Авто замын бодлого тэр чигтээ буруу явж байна. Шинэчлэл хэрэгтэй” гэсэн бол Нийслэлийн Агаар, орчны бохирдлын асуудал хариуцсан төслүүдийн удирдагч З.Төмөртөмөө Нийслэлийн Байгаль орчны газарт Хөрсний хэлтэс байгуулахаар болсныг хэллээ. Учир нь улсын хэмжээнд хөрс хариуцсан мэргэжилтэн БОАЖЯ, Улаанбаатар хотын Захирагчийн ажлын албанд л байдаг, энэ талаарх бодлого орхигдож иржээ. Мөн тэрбээр хөрсний бохирдлын томоохон судалгаа хэрэгтэй гэдгийг онцлоод байгаль хамгаалагч нарын ажлын байр, цалин, хангамж, унаа зэрэгт мөнгө төсөвлөх шаардлагатай байгааг хэлсэн юм.

Хариулах


ШИНЭ МЭДЭЭ



Ангилал өөрчлөх бол дахин бүртгүүлнэ үү.

Дээш
Tweet