Хөгжлийн бэрхшээлтэй иргэдийн нэгдсэн “Ability Expo-2023” өдөрлөг боллоо

Тогтвортой хөгжил, эрх тэгш оролцоо, олон талт байдлыг дэмжих, хөгжлийн бэрхшээлтэй иргэдийн нэгдсэн “Ability Expo-2023” өдөрлөг хоёр дахь жилдээ болж, НЗДТГ-аас хамтран зохион байгуулж байна. Хөгжлийн бэрхшээлтэй иргэдийн оролцоог дэмжих, тулгамдсан асуудлуудыг хэлэлцэх зорилготой тус арга хэмжээний үеэр хөдөлмөр эрхлэлт, эрүүл мэнд, технологи, боловсрол гэсэн үндсэн дөрвөн чиглэлийн хүрээнд нээлттэй илтгэл, хэлэлцүүлгүүдийг өрнүүллээ.

Түүнчлэн хөгжлийн бэрхшээлтэй иргэд өөрсдийн бизнесийг танилцуулж, урласан бүтээлээр үзэсгэлэн худалдаа зохион байгууллаа. Мөн тус арга хэмжээний хүрээнд хөгжлийн бэрхшээлтэй иргэдэд чиглэсэн технологийн дэвшил, шийдлүүдийг олон нийтэд сурталчилсан юм. Өдөрлөгийг

- Цахим хөгжил, харилцаа холбооны яам
- Хөдөлмөр, нийгмийн хамгааллын яам
- Боловсрол, Шинжлэх ухааны яам
- НЗДТГ
- “Хайнд Про” технологийн компани
- Олон улсын Ротари байгууллага
- Социал, демократ Монголын залуучуудын холбоо ерөнхийлөн зохион байгуулж, Нийслэлийн Хөдөлмөр, халамжийн газар, Хөгжлийн бэрхшээлтэй хүний хөгжлийн ерөнхий газар, “Эйч ар ментор групп” ХХК хамтран зохион байгуулагчаар оролцлоо.

“Ability Expo-2023” өдөрлөг Шангри-Ла хүлээн авалтын танхимд боллоо. Өдөрлөгийн төгсгөлд “Онцлох бизнес”, “Хүртээмжээр түүчээлэгч хэвлэл мэдээлэл”, “Тогтвортой хөгжлийн зорилтоор түүчээлэгч байгууллага”, “Хүртээмжээр түүчээлэгч бизнес”-ийг шалгаруулж, шагнал гардуулав.