Албан үүргээ гүйцэтгэх явцдаа 191 цагдаагийн албан хаагч гэмт хэргийн шинжтэй үйлдэлд өртжээ

Гэрэл зургийг MPA.mn

Цагдаа, дотоодын цэргийн анги, байгууллагын алба хаагчдаас 2023 оны эхний 10 сарын байдлаар хуульд заасан албан үүргээ гүйцэтгэх явцдаа гэмт хэргийн шинжтэй 176 үйлдэлд 191 алба хаагч өртөж, хохирсон тохиолдол бүртгэгджээ.

Гэмт хэргийн шинжтэй үйлдэлд өртөж, хохирсон 191 алба хаагчаас зам тээврийн ослоор 1 алба хаагч, золгүй байдлаар 1 алба хаагч тус тус амь хохирсон, шинжээчийн дүгнэлтээр 20 алба хаагчийн биед хүнд, хүндэвтэр, хөнгөн гэмтэл учирсан, 148 алба хаагчийн биед эрүүл мэндийг сарниулах гэмтэл тогтоогдоогүй, байгууллагын эд хөрөнгө, алба хаагчийн хувцас, хэрэглэлийг эвдэж гэмтээсэн 47 тохиолдол бүртгэгдсэн байна.

Мөн Цагдаагийн байгууллага, алба хаагчийн талаар хэвлэл мэдээлэл, олон нийтийн цахим сүлжээ ашиглан илт худал мэдээлэл тараасан 10 тохиолдол бүртгэгджээ.

Тус байгууллагаас алба хаагчдын эрх, хууль ёсны ашиг сонирхлыг хамгаалах зорилгоор өмгөөлөгчөөр хангах, шаардлагатай хууль, эрх зүйн зөвлөгөө өгөх чиглэлээр зохион байгуулалтын арга хэмжээг тухай бүр авч ажиллаж байна.