Дархан хотын бохир ус цэвэрлэх байгууламжийг шинээр барих ажлын гүйцэтгэл 92.3 хувьтай байна

Дархан хотын бохир ус цэвэрлэх байгууламжийг шинээр барьж байгаа билээ. МОН3244/3245 төслийн цэвэрлэх байгууламж болох А1-1 багц ажил 95 хувийн гүйцэтгэлтэй байгаа бол нийт ажлын гүйцэтгэл 92.3 хувьтай явж байгаа аж.

Үе шатны гүйцэтгэл, төлбөрийн хугацаа байгууллагын мөнгөн урсгалын чадамжаас хамааран бага зэргийн хоцрогдолтой явж байгаа ч төлбөрийн санхүүлжилтийг яаралтай шийдэж өгвөл хоцрогдолтой хугацааг нөхөх боломжтой гэдгийг гүйцэтгэгч байгууллагууд хэлж байна.

Барилга, хот байгуулалтын дэд сайд Э.Золбоо төслийн ажлыг хурдацтай явуулахад бодлогын дэмжлэг үзүүлж ажиллахаа илэрхийлээд дараах үүрэг чиглэлийг албаныханд өгчээ.

-Эхний ээлжинд улирлын чанартай асфальт, бетон цутгалтын ажлыг чанар стандарт алдагдуулахгүйгээр гүйцэтгэх,

-Ногоон байгууламж, зам талбайн тохижилтод онцгой анхаарах,

-Нэмэлтээр хийж гүйцэтгэсэн ажлуудыг баримтаар баталгаажуулах,

-Тоног төхөөрөмжүүдийн төлбөр тооцоог барагдуулан төслийг төлөвлөсөн хугацаандаа буюу 11 сард дуусгаж, ашиглалтад өгөхийг үүрэг болгожээ.