ЕБС-ийн 174 сурах бичигт хийсэн шинжилгээний дүгнэлтийг танилцууллаа

Боловсрол, шинжлэх ухааны сайдын тушаалаар өнгөрсөн гуравдугаар сард 45 хүний бүрэлдэхүүнтэй ажлын хэсэг байгуулж ахлагчаар нь Монгол Улсын Гавьяат багш С.Төмөр-Очирыг томилсон.

Уг ажлын хэсэг ерөнхий боловсролын сургуулийн 35 судлагдахууны одоо ашиглаж буй 174 сурах бичигт дүн шинжилгээ хийж өнөөдөр (2021.10.12) эхний байдлаар дүгнэлт, зөвлөмжөө танилцууллаа. Дүгнэлт гаргахдаа сурах бичгийн,

• Агуулга
• Арга зүй,
• Найруулга, зөв бичгийн дүрэм, логик холбоо
• Дизайн гэсэн үндсэн дөрвөн хэсэгт төвлөрч ажиллажээ.

Шинжилгээний ажлын үр дүнг ерөнхийд нь авч үзвэл сургалтын хөтөлбөр, сурах бичгийн агуулга хоорондоо нийцэж байв. Гэхдээ энэ нь хөтөлбөр сайн гэсэн ойлголт биш юм. Сурах бичгийн дизайнд тавигдах шаардлага хангалттай гэж үзжээ.

Харин дутагдлын тухайд,

• Сурах бичгүүд мэдлэг олгоход чиглэж байна. Мэдлэгээ амьдралд хэрэглэх, дадал болгоход дутуу анхаарсан.
• Сурагчид бие даан ажиллаж, өөрөө мэдлэг бүтээх талд илт хоцрогдсон
• Байгалийн ухаан, мэдээлэл зүйн хичээлүүд шинжлэх ухаан, технологийн өнөөгийн хөгжлийн түвшнээс хоцорсон
• Сурах бичигт тогтвортой хөгжлийн үзэл баримтлал, жендерийн болон уламжлал, зан заншил харьцангуй бага тусгасан
• Сурах бичгийн сэдэв, дэд сэдвүүд болон түвшин, хичээл хоорондын логик холбоо алдагдсан
• Сурах бичиг зохиогчдыг зөв сонгоогүй, анги бүрийн сурах бичиг зохиогчид, редакторууд өөр өөр байгаа нь дээрх алдаа гарах шалтгаан болсон
• Сурах бичиг зохиох, хэвлэх, түгээх ажил цаг хугацаанд баригддаг учир алдаа гаргах, туршихгүй хэрэглээнд нэвтрүүлэх үндэс болдог
• Сурах бичгийг тогтвортой хэрэглэх
• Зөв бичгийн дүрэм, уншихад ойлгомжтой цөөн үгтэй байх, найруулгын хувьд анхаарах
• Казах сурах бичгийн хувьд хос хэлний боловсролд анхаарах

Ажлын хэсэг дотроо 13 дэд хэсэгт хуваагдаж байгаа бөгөөд сурах бичиг тус бүрээр 2500 орчим хуудас тайлан бичиж байгаа аж. Үүнээс гарсан дүгнэлт, зөвлөмжийг хэрэгжүүлэх нь хамгийн чухал. Эхнээсээ ажил хэрэг болж байгаа нь хуулийн төсөлд тусгасан саналуудаас харагдана. Боловсролын ерөнхий хууль болон дагалдуулан өргөн мэдүүлсэн хуулийн төслүүдэд сурах бичгийн ажлын хэсгийнхэн 20 орчим санал тусгуулаад байна гэж Боловсрол, шинжлэх ухааны яамнаас мэдээллээ.