“400 Mawozo” бүлэглэл АНУ-ын номлогчдыг хулгайлсан хэрэгт буруутгагдаж байна

Гаити улсын нийслэл Порт-о-Пренс хотын ойролцоо Хойд Америкийн хэсэг номлогчдыг барьцаалсан хэрэг өнгөрсөн бямба гарагт гарсан бөгөөд хэргийг “400 Mawozo” бүлэглэл үйлдсэн гэж албаны хүмүүс мэдэгдэв. Таван эрэгтэй, долоон эмэгтэй, таван хүүхэд нийт 17 хүн хулгайлагдсан байна. Албаны хүмүүсийн мэдээлж байгаагаар “400 Mawozo” бүлэглэл нь дөрөвдүгээр сард Католик шашны лам нарыг хулгайлсан хэрэгт буруутгагдаж байжээ.

Гаити бол хүн хулгайлах гэмт хэргийн тоогоороо дэлхийд тэргүүлдэг орон юм. 2021 оны эхний гурван улиралд 600 гаруй хүн хулгайлсан тохиолдол бүртгэгдсэн бол өнгөрсөн оны мөн үед энэ тоо 231 байсан гэж орон нутгийн иргэний нийгмийн бүлгээс мэдээлэв. Долдугаар сард Ерөнхийлөгч Жовенел Моисегийн амийг хөнөөсөнтэй холбоотойгоор хүн хулгайлах гэмт хэргийн тоо өссөн бөгөөд өрсөлдөгч бүлэглэлүүд улс орныг хяналтандаа авахын төлөө цагдаагийн байгууллагатай тэмцэж байгаа юм.

Порт-о-Пренс хотод төвтэй Хүний эрхийн шинжилгээ, судалгааны төвийн захирал Гедеон Жанын хэлснээр хүн хулгайлах гэмт хэргийн дийлэнхийг “400 Mawozo” бүлэглэл үйлдсэн байна. Гаитийн цагдаагийн байцаагч Франц Шампань “AP” агентлагт хэлэхдээ өнгөрсөн бямба гарагт АНУ-ын 16 иргэн, Канадын нэг иргэнийг хулгайлсан гэмт хэргийн ард мөн тус бүлэглэл байгаа гэж үзэж байна. Түүнчлэн “AFP” агентлагийн мэдээлснээр орон нутгийн тодорхойгүй тооны иргэдийг хулгайлсан байна.

“Washington Post” сонинд бичсэнээр хулгайлагдсан хүмүүсийн нэг нь “Whatsapp” мессежээр тусламж хүсжээ. "Биднийг барьцаалж байна, тэд манай жолоочийг хулгайлсан. Тэд биднийг хааш нь аваачиж байгааг мэдэхгүй байна" гэж бичсэн байна.

“400 Mawozo” бүлэглэл ихэвчлэн солилцоо хийхийг шаарддаг бөгөөд дөрөвдүгээр сард Католик шашны лам нарыг аюулгүйгээр буцааж өгөхийн тулд нэг сая доллар нэхэж байжээ. Харин бямба гарагт хулгайлагдсан номлогч нарын хувьд одоогоор ямар нэгэн шаардлага тавьсан эсэх нь тодорхойгүй байна.

Эх сурвалж: BBC