Халдлагад исламист радикалууд оролцсон гэж Казахстан мэдэгдэв

Өнгөрсөн долоо хоногт засгийн газрын байр, аюулгүй байдлын хүчнийхэн рүү халдлага үйлдсэн хүмүүсийн дунд гадаадад бэлтгэгдсэн Исламист радикалууд байсан бөгөөд цагдаа нар нөхцөл байдлыг хяналтандаа авахын тулд одоогоор 8000 орчим хүнийг баривчилсан гэж Казахстан даваа гарагт мэдэгдэв.

Өнгөрсөн долоо хоногт шатахууны үнийн өсөлтийг эсэргүүцсэн тайван жагсаал тус улсын түүхэн дэх хамгийн аймшигт хүчирхийлэл болж, хэд хэдэн хотод жагсагчид засгийн газрын барилгуудыг богино хугацаанд эзлэн авч, галдан шатаасан.

Ерөнхийлөгч Касым-Жомарт Токаев танхимаа огцруулж, гал нээх тушаал гаргаж, газрын тосоор баялаг 19 сая хүн амтай тус улсад онц байдал зарлав. Мөн тэрээр Орос тэргүүтэй Хамтын аюулгүй байдлын гэрээний байгууллагаас цэргийн тусламж хүссэн бөгөөд засгийн газрын мэдээлснээр гадаадын цэргийн хүчин стратегийн объектуудыг хамгаалахад дэмжлэг үзүүлж байна.

"Алматы болон тус улсын бусад хэд хэдэн бүс нутагт болсон үйл явдлуудаас харахад Казахстан улс хилийн чанадад бэлтгэгдсэн, сайн зохион байгуулалттай террорист бүлэглэлийн зэвсэгт түрэмгийлэлд өртөж байна. Урьдчилсан мэдээллээр халдлага үйлдэгсэд нь радикал исламын бүлэглэлийн эгнээнд цэргийн байлдааны бүсэд ажиллаж байсан туршлагатай хүмүүс байгаа юм" гэж ГХЯ-ны мэдэгдэлд дурджээ.

Мэдэгдэлд ямар нэг бүлгийг нэрлээгүй байна.

Түүнчлэн албан ёсны гашуудлын өдөр буюу даваа гарагт Үндэсний аюулгүй байдлын хорооноос нөхцөл байдал тогтворжиж, хүчнийхэн хяналтаа сэргээсэн гэж мэдэгдлээ. Тус хорооны дарга асан Карим Масимовыг өнгөрсөн долоо хоногт ажлаас нь чөлөөлсний дараа эх орноосоо урвасан хэргээр саатуулаад байгаа.

Оросын болон төрийн хэвлэлүүд засгийн газрын олон нийтийн сүлжээн дэх нийтлэлээс иш татан 164 хүн амиа алдсан гэж мэдээлсэн бол эрүүл мэнд, цагдаагийн удирдлагууд энэ тоог батлаагүй бөгөөд анхны нийтлэлийг устгасан байна.

Даваа гарагт Төрийн нарийн бичгийн дарга Йерлан Карин төрийн телевизэд ярилцлага өгөхдөө "Дотоодын болон гадаадын тодорхой хорлон сүйтгэгч хүчний оролцоотой ямар нэгэн хуйвалдаан байсан гэж би бодож байна" гэж хэлэхдээ сэжигтний нэрийг дурдаагүй байна.

Эх сурвалж: Reuters