Бээжингийн олимпын баатрууд

Энэ удаагийн олимпоос таван медаль хүртсэн дөрвөн тамирчин тодрон гарлаа. Норвегийн Йоханнес Бё дөрвөн алт, нэг хүрэл зүүж, эрчүүдийн биатлоны босоо аварга гэдгээ харуулав. Тэрбээр Солт-Лейкийн олимпоос дөрвөн алт авсан нутаг нэгт Оле Эйнар Бьорндалений дээд амжилтыг давтсаны зэрэгцээ нэг олимпоос таван медаль хүртсэн анхдагчдын нэг болсон юм.

Норвегийн М.Розеланд, Францын К.Фийон нар түүнтэй адил таван медаль өөрийн болгожээ.

Францын Кантен Фийон Майе зургаан төрлөөс бүгдээс нь медаль авч, түүхэнд нэрээ бичүүлэх боломжтой байсан ч сүүлийн масс стартад дөрөвдүгээр байр эзэлсэн.

Оросын Александр Большунов нэг олимпоос таван медаль хүртсэн анхны цаначин болсноос гадна “Пёнчан-2018”-ыг оролцуулаад олимпын есөн гараанд хурд сорьж, бүгдээс нь медаль хүртсэн өвөрмөц амжилтын эзэн боллоо.

Ингээд Бээжингийн олимпоос дөрөв болон түүнээс дээш медаль хүртсэн тамирчдыг танилцуулья.

• Йоханнес Бё /Норвеги, биатлон/ 4 алт, 1 хүрэл
• Александр Большунов /Орос/ 3 алт, 1 мөнгө, 1 хүрэл
• Марте Розеланд /Норвеги, биатлон/ 3 алт, 2 хүрэл
• Кантен Фийон Майе /Франц, биатлон/ 2 алт, 3 мөнгө
• Ирен Схаутен /Нидерланд, тэшүүр/ 3 алт, 1 хүрэл
• Тарей Бё /Норвеги, биатлон/ 2 алт, 1 мөнгө, 1 хүрэл
• Йоханнес Клебо /Норвеги, цана/ 2 алт, 1 мөнгө, 1 хүрэл
• Сюзанне Схюлтинг /Нидерланд, тэшүүр/2 алт, 1 мөнгө, 1 хүрэл
• Михо Такаги /Япон, тэшүүр/ 1 алт, 3 мөнгө

Эх сурвалж: МҮОХ