Марк Зукерберг “WhatsApp” аппликейшнд нууцлалын томоохон шинэчлэлт хийхээр болсныг мэдэгдлээ

“WhatsApp”-ын шинэчлэлийн хүрээнд аппликейшнд хэд хэдэн өөрчлөлт хийхээр болсныг Марк Зукерберг өөрийн “Facebook” хаягаар мэдэгдсэн байна.

Наймдугаар сарын сүүлээр гарах шинэчлэлтэд бусдад мэдэгдэхгүйгээр групп чатаас гарах, онлайн байгаагаа хэнд харуулах, хэнд харуулахгүй байхаа тохируулах зэрэг нууцлалын тохиргоонууд багтжээ.

Мөн хэрэглэгч нээж харсны дараа устгагдах зориулалттай “View Once” мессежийг скрийншот хийх (дэлгэцийн агшинг зургаар хадгалах)-ыг хориглодог болж байгаа аж.

“WhatsApp”-ын мэдээлснээр скрийншотыг блоклох хэрэгслийг одоогоор туршиж байгаа бөгөөд удахгүй хэрэглэгчдэд хүрнэ гэв.

Марк Зукербергийн хэлснээр мессежийн платформд хийж буй шинэчлэлтүүд нь онлайн харилцан ярианы нууцлалыг сайжруулах зорилготой гэнэ.