Цэцэрлэгийн бүртгэл МАРГААШ, нэгдүгээр ангийн элсэлт НӨГӨӨДӨР хаагдана

Төрийн өмчийн сургуулийн нэгдүгээр ангийн элсэлт баталгаажуулалт болон нийслэлийн цэцэрлэгт хамрагдах хүсэлтийг E-Mongolia системээр хүлээн авч байгаа. 2022-2023 оны хичээлийн жилд нийслэлийн цэцэрлэгт 150,735 хүүхэд хамрагдах ёстойгоос өнөөдрийн байдлаар 100,689 хүүхэд хүсэлтээ ирүүлсэн буюу 66.5%-ийн ирцтэй байна гэж БШУЯ-наас мэдээллээ.

Харин улсын хэмжээнд нэгдүгээр ангид шинээр элсэн суралцах 78,098 хүүхэд байгаагаас 21% нь элсэлтээ цахимаар баталгаажуулж, 1.7% нь элсэлтээс татгалзжээ. Цэцэрлэгт хамрагдах хүсэлт наймдугаар сарын 24-ний өдрийн 17:00 цагт хаагдах бөгөөд 25-26-ннд цэцэрлэгийн хуваарилалтыг хийнэ. Харин наймдугаар сарын 26-аас есдүгээр сарын 9 хүртэл бүртгэлийн баталгаажуулалт хийгдэх юм. Харин энэ бүртгэлээс хоцорсон хүүхдүүд есдүгээр сарын 10-аас эхлэх хоёрдугаар ээлжийн бүртгэлд хамрагдах боломжтой юм. 

Монгол Улсын Засгийн газраас хүүхэд бүрийг цэцэрлэгт хамруулах зорилгын хүрээнд энэ жил цэцэрлэгийн насны хүүхдүүдийг энэ сарын 10-24-ны хооронд, есдүгээр сарын 10-25-ны хооронд, аравдугаар сарын 3-24 хооронд гэхчилэн гурван ээлжээр бүртгэнэ.

Харин энэ жил ЕБС-ийн нэгдүгээр ангид элсэгчдийн бүртгэл наймдугаар сарын 25-ны 17:00 цаг хүртэл явагдана. Иймд эцэг эх, асран хамгаалагчид та бүхнийг цагийг нь тулгалгүй,  бүртгүүлэхээрэй.

ЦЭЦЭРЛЭГТ ХАМРАГДАХ ХҮСЭЛТ ИЛГЭЭХ ВИДЕО ЗААВАР.

НЭГДҮГЭЭР АНГИД БҮРТГҮҮЛЭХ ВИДЕО ЗААВАР.