М.Энхсайхан: Нэгэнт намайг буруутгах гэж байгаа бол шийдвэр гаргасан хүмүүсээс тайлбар ав

2020-04-16

-Яллагдагч М.Энхсайханыг шүүхэд шилжүүллээ-

Ерөнхий сайд асан М.Энхсайханд холбогдох урьдчилсан хэлэлцүүлгийн шүүх хурал өнөөдөр Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхэд болж, тэрбээр сэтгүүчдэд мэдээлэл өгсөнийг дээрх лайваас үзээрэй.

…………………………………………………………………………..

Тэрбээр “Өнөөдөр урьдчилсан хэлэлцүүлэг болж прокуророос бүрдүүлсэн материал шүүхэд авч хэлэлцэхэд бүрэн бүтэн байгаа эсэхийг хэлэлцлээ. Шүүх хурал энэ сарын 23-нд болохоор товлогдлоо. Миний өмгөөлөгч гомдол гаргасан. Тавантолгойн дэмжлэгтэй гээд байгаа асуудлыг мөрдөн байцаалтад буцаан тодруулах хүсэлт гаргасан. Би УИХ-ын шийдвэрийг хэрэгжүүлсний төлөө яллагдагч болчихоод байна. Нэгэнт намайг буруутгах гэж байгаа бол шийдвэр гаргасан хүмүүсээс тайлбар авах хэрэгтэй” гэв.

Нийслэлийн прокурорын газраас М.Энхсайханд холбогдуулан Эрүүгийн хуулийн тусгай ангийн 19.6 дугаар зүйлийн 1 дэх хэсэг, мөн хуулийн тусгай ангийн 22.1 дүгээр зүйлийн 1, 2 дахь хэсгүүдэд зааснаар яллах дүгнэлт үйлдэж ирүүлсэн эрүүгийн хэргийг Нийслэлийн Сүхбаатар дүүргийн Эрүүгийн хэргийн анхан шатны шүүхэд хүлээн авч хянаад:

Яллагдагч М.Энхсайханы өмгөөлөгч Д.Оросоо нь Эрүүгийн хэрэг хянан шийдвэрлэх тухай хуулийн 33.1 дүгээр зүйлийн 6 дахь хэсэгт зааснаар урьдчилсан хэлэлцүүлэг хийлгэх хүсэлт гаргасныг шүүх хүлээн авч 2020.4.09-ний өдрийн 16.00 цагт урьдчилсан хэлэлцүүлгийг хийх шүүх хуралдааны тов гарсан боловч өмгөөлөгч Д.Оросоо нь эрүүл мэндийн шалтгааны улмаас шүүх хуралдааныг хойшлуулах хүсэлтийг эмнэлгийн магадлагааны хамт шүүхэд ирүүлсэн, мөн яллагдагч М.Энхсайхан нь шинээр нэмж өмгөөлөгч Ч.Эрдэнэбат, Г.Бат-Отгон нарыг өөрийгөө өмгөөлүүлэхээр авсан. Эдгээр өмгөөлөгч нар нь хэргийн материалтай танилцах хүсэлтийг шүүхэд гаргасныг шүүх тус тус хүлээн авч, шүүхийн урьдчилсан хэлэлцүүлгийн шүүх хуралдааныг өнөөдрийн 15.00 цаг хүртэл хойшлуулсан байсан.

Өнөөдөр буюу 2020-04-16-ны өдрийн 15:00 эхэлсэн урьдчилсан хэлэлцүүлгийн шүүх хуралдаанаар яллагдагч М.Энхсайханыг шүүхэд шилжүүлж, гэм буруугийн шүүх хуралдааныг 2020.04.23-ны өдрийн 08:30 цагт хийхээр товлож, шүүгдэгчийн өмгөөлөгч нарын гаргасан хүсэлтийг гэм буруугийн шүүх хуралдаанаар хэлэлцүүлэхээр боллоо.

Түүнд холбогдуулсан хуулийн заалтуудыг дурдвал,

19.6 дугаар зүйл. Хорлон сүйтгэх
1.Монгол Улсын үндэсний аюулгүй байдал, тусгаар тогтнол, батлан хамгаалах, эдийн засгийн хүчин чадлыг сулруулах зорилгоор барилга байгууламж, зам, мэдээлэл, холбооны хэрэгсэл, үндэсний шинж чанартай мэдээллийн сан, архив, хүн амын амьдралыг хангах объектыг сүйтгэсэн, гэмтээсэн, үйл ажиллагааг нь доголдуулсан; хүн, амьтан, ургамлын гоц халдварт өвчин тараасан бол найман жилээс арван таван жил хүртэл хугацаагаар хорих ял шийтгэнэ.
22.1 дүгээр зүйл.Эрх мэдэл, албан тушаалын байдлаа урвуулан ашиглах
1.Нийтийн албан тушаалтан албан үүрэг, бүрэн эрх, албан тушаалын байдлаа урвуулан ашиглаж, эсхүл зориуд хэрэгжүүлэхгүй байж өөртөө, бусдад давуу байдал бий болгосон бол нийтийн албанд томилогдох эрхийг хоёр жилээс таван жил хүртэл хугацаагаар хасаж таван мянга дөрвөн зуун нэгжээс хорин долоон мянган нэгжтэй тэнцэх хэмжээний төгрөгөөр торгох, эсхүл нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэнэ.

2.Нийтийн албан тушаалтан албан үүрэг, бүрэн эрх, албан тушаалын байдлаа урвуулан ашиглаж их хэмжээний хохирол учруулсан бол нийтийн албанд томилогдох эрхийг хоёр жилээс таван жил хүртэл хугацаагаар хасаж таван мянга дөрвөн зуун нэгжээс хорин долоон мянган нэгжтэй тэнцэх хэмжээний төгрөгөөр торгох, эсхүл нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэнэ гэжээ.